काय आहे प्रकरण?

बांधकाम व्यावसायिकाच्या कार्यालयातील अकाउंटंटशी संपर्क साधून ६६ लाख ४२ हजार रुपयांचा गंडा घालणाऱ्या दोघांना सायबर पोलिसांनी बिहारमधून अटक केली आहे. त्यांच्याकडून विविध कंपन्यांचे ३६ सीमकार्ड, आठ मोबाइल, १९ एटीएम कार्ड, गावठी कट्टा व सहा काडतुसे जप्त करण्यात आली आहेत. बेलाल शबीर अन्सारी (वय २१, रा. इजमायली, बिहार) आणि कामरान इम्तियाज अन्सारी (वय २३, सिवान, बिहार) अशी अटक केलेल्यांची नावे आहेत. यापूर्वी विशालकुमार भरत मांझी (वय २१ रा. सिवान, बिहार) याला अटक केली आहे, अशी माहिती आर्थिक व सायबर शाखेचे उपायुक्त श्रीनिवास घाडगे यांनी गुरुवारी पत्रकार परिषदेत दिली. वरिष्ठ पोलिस निरीक्षक मीनल पाटील आणि पोलिस निरीक्षक चंद्रशेखर सावंत उपस्थित होते.

आरोपींचा मोबाइल, ई-मेल आयडी व बँक खात्यांचा तांत्रिक तपास केला असता चोरटे बिहारमध्ये असल्याचे समजले. सायबर पोलिसांच्या पथकाने बिहार येथे जाऊन बिशाल मांझीला ताब्यात घेतले होते. त्याच्या साथीदारांचे मोबाइल, ई-मेल आयडीसह वेगवेगळ्या बँक खात्यांचा तांत्रिक तपास करून मुख्य आरोपी बेलाल अन्सारी आणि कामरान अन्सारी यांना अटक करण्यात आली, असे पाटील यांनी सांगितले.

पाटील यांच्यासह सावंत, उपनिरीक्षक प्रमोद खरात, संदेश कर्णे, दत्तात्रय फुलसुंदर, अश्विन कुमकर, प्रवीणसिंग राजपूत, वैभव माने, दिनेश मरकड, शिरीष गावडे, राजेश केदारी, योगेश व्हावळ यांच्या पथकाने ही कामगिरी केली.
फडणवीसांच्या पीएच्या नावे बनावट ईमेल, बदलींचे खोटे आदेश, मिरजहून तरुणाला अटक
गुन्ह्यातील महत्त्वाचे मुद्दे

– अकाउंटंटने संबंधित बँक खात्यात ६६ लाख ४२ हजार रुपये पाठवले.
– सायबर चोरट्याने वारंवार पैशांची मागणी केल्याने अकाउटंटला संशय आला.
– खातरजमा केली असता, फसवणूक झाल्याचे उघडकीस आले.
– आरोपींनी हैदराबादमधील एकाची २५ लाख रुपयांची फसवणूक केली आहे.
– बिहार पोलिसही या टोळीच्या शोधात.

सायबर चोरटे इंटरनेटच्या माध्यमातून कंपनीची माहिती घेऊन अकाउंटंटशी संपर्क साधतात. कंपनीच्या प्रमुखाचा डीपी ठेवून पैसे पाठवायला सांगतात. अशा पद्धतीचे गुन्हे घडत असल्याने आर्थिक व्यवहार करताना नागरिकांनी खात्री करणे आवश्यक आहे.- श्रीनिवास घाडगे, उपायुक्त, आर्थिक व सायबर शाखा