बारामती : ‘कोणाला नमस्कार न घालता, चहा न पाजता तुम्ही दूध संघावर संचालक, चेअरमन, व्हाइस चेअरमन झाला आहेत. फक्त लग्न पत्रिकेवर प्रेषक म्हणून नाव टाकण्यापुरती पदे वापरू नका. दुसऱ्यांचे पशुखाद्य खपतेय, तुमचे का खपत नाही? तुम्ही कशात मागे पडताय? इथला एचआर विभाग असून नसल्यासारखा आहे. त्याकडे लक्ष देणे एमडींचे काम नाही का? ते जर नीट काम करत नसतील तर संचालक मंडळाने त्यांना बाजूला करावे. मी माझा नातेवाईक असला तरी कोणाचा मुलाहिजा ठेवत नाही. व्यवसाय व्यवसायाच्या पद्धतीने झाला पाहिजे. माझ्याकडे वेळ नाही, नाही तर मी संचालक मंडळाला सुतासारखे सरळ केले असते,’ अशा शब्दांत राष्ट्रवादीचे नेते आणि राज्याचे उपमुख्यमंत्री अजित पवार यांनी बारामती तालुका सहकारी दूध संघाच्या पदाधिकारी-अधिकारी व संचालक मंडळाला जोरदार फटकारले.
‘तुमचा आवाका किती? मी राज्य सांभाळतो, तुम्ही एवढा-एवढा दूध संघ सांभाळला तर मला शिकवता का? या शब्दात अजित पवार यांनी हजेरी घेतली. पवार यांच्या आक्रमक बाण्याने सभेला वेगळेच वळण लागले. बारामती तालुका दूध संघाची ४६ वी वार्षिक सर्वसाधारण सभा शनिवारी (दि. २३) पार पडली. यावेळी पवार यांनी संचालक मंडळासह संघाच्या अधिकाऱ्यांना जोरदार कानपिचक्या दिल्या. कारभार सुधारा,अन्यथा मला विचार करावा लागेल, असेही पवार म्हणाले.
‘तुमचा आवाका किती? मी राज्य सांभाळतो, तुम्ही एवढा-एवढा दूध संघ सांभाळला तर मला शिकवता का? या शब्दात अजित पवार यांनी हजेरी घेतली. पवार यांच्या आक्रमक बाण्याने सभेला वेगळेच वळण लागले. बारामती तालुका दूध संघाची ४६ वी वार्षिक सर्वसाधारण सभा शनिवारी (दि. २३) पार पडली. यावेळी पवार यांनी संचालक मंडळासह संघाच्या अधिकाऱ्यांना जोरदार कानपिचक्या दिल्या. कारभार सुधारा,अन्यथा मला विचार करावा लागेल, असेही पवार म्हणाले.
संघाच्या खंडोबानगर येथील पेट्रोलपंपाचा प्लॅन चुकला होता. काही जणांना तर डोकीच नाहीत. मी आल्यावर बघितले तर कॉलम उभे राहिले होते. मागील पदाधिकाऱ्यांना मी पाडायला लावले. तर दादा आता काम उभे राहिलेय. कसे काय पाडायचे? असे ते म्हणाले. अरे तुझ्या काकाचं काय जातंय, उद्या सभासद मला जाब विचारतील असे सांगून मी ते पाडायला लावले. तिथे व्यवस्थित मुरुम टाकून जागा भरून दिली. त्यात संघाचे लाखो रुपये वाचवले. आज तेथे प्रशस्त पंप उभा राहिला. पेट्रोल, सीएनजी, डिझेलसाठी वेगळ्या रांगा व्यवस्थितपण लागत आहेत. मला तर काही वेळा कीव करावी वाटते. अरे तुमचा आवाका किती, आम्ही एवढे मोठे राज्य सांभाळतो. तुम्ही दूध संघ सांभाळला तर मला शिकवता का,’ असं म्हणत अजित पवार यांनी आपल्या शैलीत संचालक मंडळाचा समाचार घेतला.
संचालक मंडळाने दूध पावडर प्रकल्पाची माझ्याकडे विचारणा केली आहे. पण या प्रकल्पात गुंतवणूक करताना किती खर्च येणार, कर्ज किती घेणार, प्रकल्पाची किंमत किती, मार्केट आहे का? याचा विचार केला का ? असा सवाल करून पवार म्हणाले, शंभर लिटर दूधातून साडे आठ किलो पावडर तयार होते. ते विकले तर साडे तीन हजार रुपये मिळतील. पावडर विकली तर दोन हजार रुपये मिळतील. अन्य लोकांनी पावडरीचे प्रकल्प सुरु केले ते घाट्यात गेले आहेत. इथे रिकव्हरी रेकॉर्ड ठेवलेले नाही. दूधासह उपपदार्थांची विक्री वाढण्यासाठी काय प्रयत्न केले ते मला दाखवा. बारामतीच्या नावाने हा संघ ओळखला जातो. पुणे, पिंपरी चिंचवड शहराची लोकसंख्या पाऊण कोटी आहे. ते मार्केट आपण का मिळवत नाही? तेथे विक्री वाढविण्यासाठी प्रयत्न का होत नाहीत? मार्केटिंग नेटवर्कमध्ये संवादाचा अभाव दिसतो आहे. आम्ही पगार देतो, जबाबदारी देतो. मग काय केले जातेय. ब्रॅण्डिंग, प्रमोशनमध्ये आपण कमी पडतोय. त्यासाठी प्रयत्न का केले जात नाहीत? असा सवाल त्यांनी केला.
‘डायनामिक्स जगभर पोहोचलेय तुम्ही का नाही?’
‘देश-विदेशात, राज्यात फिरत असताना आम्हाला विमानात बारामतीच्या डायनामिक्स डेअरीने तयार केलेले प्रोडक्ट मिळतात. मेड इन बारामती बघून आम्हाला आनंद होतो. डायनामिक्स संघाकडून दूध घेते. त्यांचे नेस्ले, ब्रिटानिया ब्रॅणड जगभर पोहोचले आहेत. पॅकिंग जबरदस्त आहे. लोकांचा त्यांनी विश्वास संपादन केला आहे. हे आपण नंदन ब्रॅण्डच्या बाबतीत का करू शकत नाही?’ असा खडा सवाल उपमुख्यमंत्री अजित पवार यांनी विचारला.