म. टा. प्रतिनिधी, पुणे : दारू पिऊन घरी येऊन मारहाण करणाऱ्या पतीला भीती दाखविण्यासाठी पत्नीने अंगावर थोडेसे पेट्रोल ओतून घेतले खरे; मात्र नशेत असलेल्या पतीने काडी ओढून पत्नीला पेटवून दिले. या घटनेत गंभीर जखमी झालेल्या महिलेवर ससून रुग्णालयात उपचार करण्यात येत आहेत. या प्रकरणी पती आणि सासूवर लोणी काळभोर पोलिस ठाण्यात गुन्हा दाखल करण्यात आला आहे.
नेमकं काय घडलं?
नेमकं काय घडलं?
अक्षय मारुती कुंजीर आणि आशा मारुती कुंजीर अशी गुन्हा दाखल झालेल्यांची नावे आहेत. अमृता अक्षय कुंजीर (वय २३, रा. वळती, ता. हवेली) यांनी फिर्याद दिली आहे.
पोलिसांनी दिलेल्या माहितीनुसार, फिर्यादी आणि अक्षय कुंजीर यांचा २०२० मध्ये प्रेमविवाह झाला होता. त्यांना एक मुलगा आहे. अक्षय दारू पिऊन घरी येऊन अमृताला मारहाण करायचा. दारू पिऊन त्याने घरातील सामानाची तोडफोड केली. ‘तू घरातून निघून जा, तू घरात राहायचे नाही,’ असे त्याने पत्नीला धमकावले. त्यावर ‘मी मरून जाते,’ असे म्हणून पत्नीने शेतीपंपासाठीच्या पेट्रोलमधील थोडे पेट्रोल भीती दाखविण्यासाठी अंगावर ओतले. त्या वेळी नशेत असणाऱ्या अक्षयने काडी पेटवून अमृताच्या अंगावर टाकली. पत्नीने पेट घेतल्याचे पाहून तो घाबरला आणि त्याने पाणी ओतून आग विझविण्याचा प्रयत्न केला. तोपर्यंत फिर्यादी यांची छाती, गळा आणि तोंडाला गंभीर दुखापत झाली होती. त्यानंतर त्यांना ससून रुग्णालयात दाखल करण्यात आले.
‘पतीने पेटविल्याचे सांगितलेस, तर तुझ्यावर उपचार करणार नाही,’ अशी भीती सासूने दाखविली. या प्रकाराने घाबरलेल्या महिलेने चुलीवर स्वयंपाक करताना अचानक पेट्रोल ओतल्याने भडका होऊन भाजले, अशी फिर्याद सुरुवातीला पोलिसांना दिली होती.