प्रारंभी मुख्यमंत्री शिंदे यांनी स्मृतिस्तंभास पुष्पचक्र अर्पण करून हुतात्म्यांना अभिवादन केले. त्यानंतर पोलिस दलातर्फे बंदुकीच्या फैरी झाडून अभिवादन करण्यात आले. त्यानंतर मुख्यमंत्री शिंदे यांनी ध्वजवंदन केले. राष्ट्रगीत, राज्यगीतानंतर मुख्यमंत्र्यांनी उपस्थितांना मुक्तिसंग्रामाच्या अमृतमहोत्सवी वर्षानिमित्त मराठवाडा विकासाची प्रतिज्ञा केली.

शिंदे म्हणाले, ‘हैदराबाद मुक्तिसंग्रामात अनेकांनी योगदान दिले. ‘वंदे मातरम’ने या चळवळीला गती दिली. हैदराबाद मुक्तिसंग्रामाची प्रेरणा कायम राखण्यासाठी विभागातील प्रत्येक जिल्ह्यात स्मृतिस्तंभ उभारण्यासाठी दोन कोटी रुपये देण्यात आले आहेत. यामुळे पुढील पिढ्यांना या मुक्तिसंग्रामाची प्रेरणा मिळत राहील.’

‘मागील सरकारच्या काळात मराठवाड्याचा अनुशेषात भर पडली, विकास प्रकल्प रखडले,’ असे आरोप करून आता मराठवाड्याच्या सर्वांगीण विकासाच्या पर्वाची सुरुवात झाल्याचे शिंदे यांनी नमूद केले. ‘शनिवारी झालेल्या मंत्रिमंडळ बैठकीत मराठवाड्याच्या सर्वांगीण विकासासाठी ४५ हजार कोटी रुपयांहून अधिक निधीच्या विकासकामांचा संकल्प करण्यात आला आहे. जिल्ह्यातील रखडलेल्या प्रकल्पांना सरकार गती देत आहे. ही गती देत असताना नवे प्रकल्पही कार्यान्वित करण्यात येत आहेत. केंद्र सरकारच्या मदतीनेही अनेक प्रकल्प राबविण्यात येत आहेत. त्यासाठी केंद्राकडे मदतीचा प्रस्तावही पाठविण्यात आला आहे. सध्या पावसाने ओढ दिली आहे. त्यामुळे सरकार शेतकऱ्याच्या पाठीशी खंबीर पणे उभे आहे. मराठवाड्याला विकासित प्रदेश म्हणून आपण पुढे नेण्याचा संकल्प करू या,’ असे आवाहन या वेळी शिंदे यांनी केले.ठाकरे सरकारने केला ‘वॉटर ग्रीड’चा खून; उपमुख्यमंत्री फडणवीस यांचा आरोप

ज्येष्ठ स्वातंत्र्यसैनिकांशी संवाद

ध्वजवंदन सोहळ्यानंतर मुख्यमंत्री आणि उपमुख्यमंत्र्यांनी उपस्थित स्वातंत्र्यसैनिकांच्या भेटी घेऊन त्यांच्याशी संवाद साधला. त्यांची विचारपूस केली. त्यानंतर स्मृतिसंग्रहालयास भेट देऊन पाहणी केली.