गोकुळची ६१ वी वार्षिक सर्वसाधारण सभा आज पार पडली. वार्षिक सर्वसाधारण सभा म्हणजे ज्यांनी या संस्थेला मोठा केले त्या सभासदांना संस्थेबद्दल माहिती देणे सोबतच सभासदांच्या अडचणी सोडवणे. मात्र गेल्या काही वर्षात गोकुळचा राजकारण पाहिले तर डोक्याला हात लावाव अशी स्थिती झाली आहे. पाटील आणि महाडिक यांच्या राजकारणात सर्वसामान्य सभासद ज्याला दोन्ही गटाशी आणि त्यांच्या राजकारणाशी काही संबंध नाही तो भरडला जात असून सभेत येताना आपल्या मनात घेऊन आलेले प्रश्न आणि तेथे असलेले वातावरण पाहून सर्वसाधारण सभासदाला त्याच्या प्रश्नाची उत्तरे न मिळताच पुन्हा जावे लागतय. यामुळेच की काय गोकुळचा दूध संकलन घटत चालला असून गोकुळचा प्रतिस्पर्धी असलेला अमूल हा एका तालुक्यातून जिल्हयातील सर्व तालुक्यात पाय घट्ट करत आहे.

प्रचंड गदारोळामध्ये आवाजी मतदान घेत गोकुळची वार्षिक सर्वसाधारण सभा संपन्न; शौमिका महाडिक यांना बोलण्यास माईक न दिल्याने घोषणाबाजी
सर्वसामान्य महिला सभासद या भीतीने उठून बाजूला गेल्या

गोकुळ दूध संघ म्हणजे कोल्हापूर जिल्ह्याची अर्थवाहिनी एका वेळेला आमदारकी नको पण गोकुळचा संचालक पद द्या, अशी मागणी कोल्हापुरात असते. सहकारातून सुरू झालेला गोकुळच्या माध्यमातून लाखो करोडो रुपयांच्या उलाढाली होत असतात शिवाय अनेकांना रोजगार मिळतो तर अनेक शेतकऱ्यांची घर देखील चालतात. मात्र गेल्या काही दिवसात गोकुळमध्ये सुरू असलेले राजकारण आणि विशेषतः आजच्या सभेत झालेला गोंधळ पाहून सभेसाठी आलेल्या सामान्य सभासदांनी खेद व्यक्त केला. सभा दुपारी एक वाजता सुरू होणार होती, मात्र आपल्या प्रश्नांची उत्तरे मिळावीत आणि सभा व्यवस्थित ऐकता यावी यासाठी सामान्य सभासद हा सकाळी लवकर येऊन बसला. सभा सुरू होणार होती इतक्यात विरोधी गट देखील सभेस्थळी आला आणि सत्ताधारी व विरोधकामध्ये जोरदार घोषणाबाजी सुरू झाली. दोन्ही गटातील काही अतीउत्साही कार्यकर्ते होते की बॅरिकेटिंग तुटेल की काय अशी स्थिती निर्माण झाली होती. यामुळे बाजूला बसलेल्या सर्वसामान्य महिला सभासद या भीतीने उठून बाजूला गेल्या. तरीही दोन्ही गटातील कार्यकर्त्यांच्या घोषणाबाजी काय थांबल्या नाहीत.

प्रत्येक सर्वसामान्य सभासद हा या दोन्ही गटातील कार्यकर्त्यांचा तमाशा पाहत होता तसेच समोर सभा देखील सुरू झाली होती सभेतील अर्थ समजून घेण्याचा प्रयत्न या सभासदांकडून होत होता. मात्र गोंधळ आणि घोषणाबाजी मध्ये सभा ऐकण्यात काहीसा अपयश आल्याचे चित्र प्रत्येकाच्या तोंडावरून दिसत होते. अशाच गोंधळी वातावरणात ही सभा संपली सर्वसामान्य सभासद हा उठून निघून गेला. त्याचे त्याच्या मनात असलेले प्रश्न हे अनुउत्तरीतच राहिले. मग या सर्वसामान्यास सभासदाला या सभेला येऊन मिळालं तरी काय चिवड्याचे पाकीट आणि दूध सोबत बर्फी ?

आम्ही हा गोंधळ येथे पाहायला घरदार सोडून आलो आहोत का?

या दोन्ही बाजूंकडून गोंधळ सुरू असतानाच आम्ही काही सर्वसामान्य सभासदांची प्रतिक्रिया जाणून घेण्याचा प्रयत्न केला. यामध्ये या सभासदांकडून दोन्ही बाजूच्या या कार्यकर्त्यांना काय बोलावे अशी प्रतिक्रिया सभासदांनी दिली. यातील एका महिलेने हा जो काय गोंधळ सुरू आहे तो अयोग्य आहे. काहीही सभा ऐकू येत नाही. आम्ही येथे काम करतो मात्र आमच्या प्रश्नाची उत्तर आम्हाला या गोंधळात मिळत नाहीत, अशी प्रतिक्रीया दिली. तर दुसऱ्या महिलेने तर हे असे वागणे योग्य आहे का? येथे सामान्य महिला सभा बघायला आले आहेत. हा गोंधळ पाहून भीती वाटत आहे, अशी प्रतिक्रिया दिली. तसेच आम्ही हा गोंधळ येथे पाहायला घरदार सोडून आलो आहोत का ? असा प्रश्नही त्यांनी विचारत गोकुळचा कारभार असाच चालतो असे, आम्हाला वाटत आहे. आम्ही चंदगड सारख्या लांबच्या तालुक्यातून येथे आलो. मात्र हे वातावरण पाहून आम्हाला तेथे जाऊन प्रश्न तर मांडता येतील का असे म्हणत सभेची खिल्ली उडवली. शिवाय यापुढे पुढच्या सभेला यायचं की नाही याचाही विचार करावा लागेल, असे सभासद महिलांनी म्हटले आहे. या सभासदांच्या बोलक्या प्रतिक्रिया ऐकल्यानंतर एकच सांगावस वाटत की, राजकारण बाजूला ठेवून सभासद आणि दूध उत्पादकांचा ही ऐका आणि त्यांना सेवा पुरवा अन्यथा दोघांच्या(सत्ताधारी आणि विरोधक) भांडणात तिसऱ्याचा (अमूल सारख्या प्रतिस्पर्धीचा) फायदा होईल.