म. टा. खास प्रतिनिधी, नाशिक : गेल्या आठवड्यात सोमवारी जिल्ह्यातील धरणांमध्ये अवघा ५९ टक्के पाणीसाठा होता. मात्र त्यानंतर शुक्रवारी, शनिवारी जोरदार बरसलेल्या पावसामुळे धरणांची ओंजळ अखेर भरली आहे. जिल्ह्यातील सर्व धरणांमधील एकूण उपयुक्त जलसाठा ८० टक्क्यांवर पोहचला आहे. सर्वात मोठ्या गिरणा धरणात ५३ टक्के, तर पालखेड धरणातील पाणीसाठ्यात तब्बल ४२ टक्क्यांची भर पडून तो ९७ टक्क्यांवर पोहचला आहे. यामुळे पिण्याच्या पाण्याचा प्रश्न मिटला असून, शेतीसाठीही पाणी उपलब्ध होणार आहे.
तीन दिवसांत १६ टक्के वाढ
गिरणा धरणातील पाणीसाठा ७ सप्टेंबरला ३७ टक्के होता. म्हणजेच धरणात ६ हजार ८८६ दलघफू एवढा उपयुक्त पाणीसाठा उपलब्ध होता. परंतु, ८ ते १० सप्टेंबर या कालावधीत झालेल्या पावसामुळे गिरणातील पाणीसाठ्यात १६ टक्के वाढ झाली आहे. म्हणजेच हा पाणीसाठा २ हजार ८३३ दशलक्ष घनफुटांनी वाढला आहे. ९ सप्टेंबरला हा पाणीसाठा सात टक्क्यांनी वाढून ४४ टक्क्यांवर पोहोचला, तर ११ सप्टेंबरला तो ५३ टक्क्यांवर पोहोचला आहे. विशेष म्हणजे ७ सप्टेंबरला धरणांमधील एकूण पाणीसाठा ६७ टक्के होता. तो १२ टक्क्यांनी वाढून ७९ टक्के झाला आहे. जिल्ह्यातील २४ धरणांमध्ये सध्या ५२ हजार १९६ दशलक्ष घनफूट पाणी उपलब्ध झाले आहे.
दुष्काळी सिन्नरला ‘सुजलाम् सुफलाम्’चे वेध; दमणगंगा-देव नदीजोड प्रकल्पाचा अंतिम अहवाल सादर
धरणनिहाय पाणीसाठा स्थिती
धरण-७ सप्टेंबर-११ सप्टेंबर
गंगापूर ९१ ९५
काश्यपी ६३ ८१
गौतमी गोदावरी ५८ ७८
आळंदी ८८ १००
पालखेड ५५ ९७
करंजवण ६८ ९०
वाघाड ८१ १००
ओझरखेड ४७ ८७
पुणेगाव ९२ ९४
तिसगाव ० २९
दारणा ८७ ९७
भावली १०० १००
मुकणे ७८ ८५
वालदेवी १०० १००
कडवा ८५ ९३
नांदूर मध्यमेश्वर १०० १००
भोजापूर ७१ १००
चणकापूर ९३ ९३
हरणबारी १०० १००
केळझर १०० १००
नाग्यासाक्या ०० ००
गिरणा ३७ ५३
पुनद ७५ ९२
माणिकपुंज ०० ००
एकूण ६७ ७९