मुलुंडच्या पूर्वेकडील सुब्बरामण हे ८७ वर्षीय वृद्ध एकटेच राहतात. जुलै महिन्यात त्यांच्या मोबाइलवर एका व्यक्तीचा फोन आला. त्याने आपले वीज बिल अद्याप भरले नसून त्वरित न भरल्यास रात्री ९ वाजता वीजपुरवठा खंडित करण्यात येईल. घरात एकटे असल्याने वीज गेल्यास अडचण होऊ शकते, असे वाटल्याने सुब्बरामण यांनी एमएसईबीच्या कस्टमर केअर क्रमांकावर संपर्क केला. काहीच प्रतिसाद न मिळाल्याने सुब्बरामण यांनी मोबाइलवर आलेला संदेश पाहिला. यामध्ये वीज बिल भरण्यासाठी एक लिंक देण्यात आली होती. त्यांनी या लिंकवर जाऊन वीज कनेक्शन आणि बँक खात्याचा तपशील भरला. यानंतर आलेले ओटीपीही टाकले. काही वेळातच त्यांच्या दोन बँक खात्यामधून टप्याटप्याने सुमारे नऊ लाख रुपये काढण्यात आले.

सुब्बरामण यांनी आपले बँक पासबुक तपासल्यानंतर आपल्या खात्यावरील तब्बल नऊ लाख रुपये वजा झाल्याचे त्यांच्या लक्षात आले. सायबरचोरांकडून ही फसवणूक झाली असावी, असे त्यांना सांगण्यात आल्याने सुब्बरामण यांनी नवघर पोलिस ठाण्यात धाव घेतली. त्यावेळी पद्मा आणि कृष्णानंद हे ज्येष्ठ नागरिकही पोलिस ठाण्यात तक्रार दाखल करण्यासाठी आले होते. त्या दोघांनाही महावितरणमधून बोलत असल्याचे सांगून फसवल्याचे समजले. पद्मा यांच्या बँक खात्यातून दोन लाख आणि कृष्णानंद यांच्या बँक खात्यातून सुमारे ७० हजार रुपये काढण्यात आले. त्यामुळे सुब्बरामण यांच्यासह या दोघांनीही फसवणूक झाल्याची तक्रार नवघर पोलिस ठाण्यात केली. मुलुंडच्या परिसरातच अशाप्रकारे फसवणूक होण्याचे नेमके कारण काय, याचा पोलिस शोधत आहेत.

आधीही अशी फसवणूक…

एकाच दिवशी तीन ज्येष्ठ नागरिकांच्या खात्यातून पैसे वजा झाल्याचा गुन्हा दाखल करण्याआधी दोन दिवस मुलुंडमधील अशीच घटना घडल्याचे समोर आले आहे. सायबरचोरांनी सोनिया या वृद्धेला साडेपाच लाखांचा गंडा घातल्याचे समोर आले आहे. सोनिया यांना महावितरणमधून अधिकारी बोलत असल्याचे सांगून फसविण्यात आले.