याबाबत अधिक माहिती अशी की, तक्रारदार महिला ही ग्रामीण पट्ट्यातील एका बहूमजली गृहनिर्माण सोसायटीत राहते. तिचे पती सीआरपीएफमधून सेवानिवृत्त झाले आहेत. पिडीत महिला राहत असलेल्या इमारतीचा बिल्डर सदर सोसायटी हॅण्डओव्हर करणार असल्याने बिल्डरचा प्रोजेक्ट हेड आणि मॅनेजर यांनी शनिवारी दुपारी साडेबाराच्या सुमारास सभा आयोजित केली होती. या सभेला सेवानिवृत्त लष्करी अधिकाऱ्याची पत्नी देखिल उपस्थित होती. तिथे अन्य एक महिला जी त्या सोसायटीत राहत नाही तरीही ती सभेला आल्याने महेश ठोंबरे नामक इसमाने हरकत घेऊन त्या महिलेला दटावणी केली. हे पाहून सेवानिवृत्त लष्करी अधिकाऱ्याच्या पत्नीने त्या महिलेला लक्ष देऊ नको, असा सल्ला दिला. हे ऐकून तो इसम पिसाळला.

त्याने अश्लील शिवीगाळ करत पिडीत महिलेला सर्वांसमक्ष खजील केले. मोठमोठ्या आवाजात वाद घालून सभेला जमलेल्या सदस्यांसमक्ष अश्लील हातवारे करत मांड्या थोपटून शिवीगाळ करणाऱ्या त्या इसमाने भरसभेत या महिलेला अपमानित केले. त्यावेळी बिल्डरच्या प्रोजेक्ट हेड व मॅनेजरने त्याला शांत केले. सभा संपल्यानंतर पिडीत महिलेने माफी मागण्यास सांगितले असता तो इसम माफी मागण्याऐवजी पुन्हा अश्लील भाषेत शिवीगाळ करत निघून गेला. या प्रकारामुळे पिडीत महिला खजील झाली होती.

मात्र, धीर करून तिने सोमवारी पोलिस ठाण्यात जाऊन स्वतःवर बेतलेला प्रसंग कथन केला. आरोपीने भरसभेत सर्वांसमक्ष स्त्री मनास लज्जा उत्पन्न होईल असे कृत्य करून विनयभंग केल्याचे पिडीत महिलेने पोलिस ठाण्यात दाखल केलेल्या तक्रारीत म्हटले आहे. पोलिसांनी या संदर्भात विनयभंगाच्या कलमाखाली गुन्हा दाखल केला आहे. आरोपीला अद्याप अटक करण्यात आली नाही.

ध्वजारोहणानंतर पोहायला गेले, तीन तासांनी वाईट बातमी आली, दोन अल्पवयीन मुलं बुडाली