न्यूयॉर्क आणि व्हिएन्नामध्ये दरवर्षी होणाऱ्या फेस्टिव्हलमध्ये वाद्यवादन करणाऱ्या बालकलाकारांना काही प्रसिद्ध संगीतकारांसह ऐतिहासिक वास्तुंमध्ये सादरीकरण करण्याची संधी मिळते. जगप्रसिद्ध एहरबार हॉल आणि मोझार्ट यांचं वास्तव्य असलेल्या ‘मोझार्थस’ अशा काही पुरातन वास्तूंमध्ये अयान सादरीकरण करणार आहे. ब्राहम्स, ब्रुकनर अँड माहलेरसारखे दिग्गज ज्या ऐतिहासिक वास्तूत सादरीकरण करत होते त्या ठिकाणी यातील काही कॉन्सर्ट्स होणार आहेत.
अयानचा जन्म २०१३मध्ये टोकियो शहरात झाला आणि २०१५ सालापासून तो आणि त्याचं कुटुंब मुंबईत स्थायिक झालं. अयानचे वडील तन्मय हे गणिततज्ज्ञ असून ते टीआयएफआर या संस्थेत प्राध्यापक आहेत तर त्याची आई अश्विनी या एआय पॉवर्ड आरोग्य सेवा पुरवणाऱ्या संस्थेत कार्यरत आहेत. अयाननं वयाच्या पाचव्या वर्षापासून हिंदुस्तानी शास्त्रीय संगीताचे धडे गिरवायला सुरुवात केली. त्यानंतर, त्यानं करोनाकाळात युट्यूब व्हिडीओज आणि फोनमधील ॲप्सच्या मदतीनं पियानो वाजवायला सुरुवात केली. २०२१पासून एनसीपीए येथील सिंफनी ऑर्केस्ट्रा ऑफ इंडिया म्युझिक अकादमीमध्ये त्यानं पियानोवादनाने धडे घ्यायला सुरुवात केली. अयानच्या संगीतप्रवासात ऐदा बिसेंगलिवा या त्याला मार्गदर्शक म्हणून लाभल्या. त्या अयानबद्दल सांगतात, ‘मी गेली ४० वर्षं पियानो वाजवायला शिकवत आहे, पण अयानसारखा विद्यार्थी मी पहिल्यांदा पहिला. इतर विद्यार्थी एखादी गोष्ट जर एका आठवड्यात शिकत असतील तर अयान ती दहा मिनिटांत आत्मसात करतो’.
अयानचं पियानोवादनाचं पहिलं सादरीकरण एनसीपीएमध्ये सिंफनी ऑर्केस्ट्रा ऑफ इंडिया यांच्या साथीनं आणि त्याचे दिग्दर्शक व्हायोलिन उस्ताद मरत बिसेगलिवा यांच्यासह नोव्हेंबर २०२१ला झालं. तर त्याचं पहिलं वैयक्तिक सादरीकरण जुलै २०२२ला एनसीपीए येथे पार पडलं. यात त्याने मोझार्ट, डेबुसी, चॉपीन आणि स्वतःच्या काही रचना सादर केल्या. या दोन वर्षांत अयाननं पियानो क्वींटेट, वॉल्ट्झ, सोनाटा आणि नॉकटर्नचा समावेश असलेल्या स्वतःच्या विविध संगीत रचना तयार केल्या आहेत. आजवर त्यानं पुणे म्युझिक सोसायटी, पेडर रोड येथील रशियन सेंटर फॉर सायन्स अँड कल्चर आणि कझाकस्तान येथील अल्माटी या शहरात सादरीकरणं केली आहेत. ‘आम्ही एप्रिलपासून अयानला होम स्कूलिंग देतोय, जेणेकरून त्याला त्याच्या कलेसाठी वेळ देता येईल आणि मित्रांसह खेळायलादेखील वेळ मिळेल’, अशा भावना त्याचे वडील तन्मय यांनी व्यक्त केल्या.
संकलन- अवनी परांजपे, पोदार कॉलेज