म. टा. प्रतिनिधी, छत्रपती संभाजीनगर : वडिलांचे निधन झाल्यानंतर त्यांच्या जागेवर आपल्याला नोकरी लागेल; तसेच वडील लक्ष देत नाहीत या रागापोटी मुलानेच वडिलांच्या हत्येची सुपारी दिल्याचे हनुमाननगर येथील गोळीबार प्रकरणाच्या तपासात समोर आले आहे. या प्रकरणी फिर्यादीचा मुलगा महादू प्रभू उर्फ प्रभाकर आहिरे (वय ३२, रा. चिंचोली, ता. कन्नड) याच्यासह हल्लेखोर सचिन भास्कर अंभोरे (वय २४, रा. गणेशपूर, ता. कन्नड) आणि नंदकिशोर परसराम अंभोरे-देशमुख (वय माहिती नाही, रा. कमळापूर शिवार) या तिघांना अटक करण्यात आली आहे, अशी माहिती पोलिस आयुक्त मनोज लोहिया यांनी बुधवारी पत्रकारांशी बोलताना दिली.
महापालिकाचे सेवानिवृत्त सफाई कामगार प्रभू उर्फ प्रभाकर आनंदा आहिरे (रा. हनुमाननगर) यांच्यावर दोन हल्लेखोरांनी गोळीबार केल्याची घटना ३१ जुलै रोजी सायंकाळी साडेचारच्या सुमारास घडली होती. प्रभाकर घरात पत्नी व मुलांसह असताना दोन हल्लेखोर घरात आले आणि त्यांनी फिर्यादीच्या दिशेने गावठी कट्ट्याने गोळी झाडली होती. फिर्यादी खाली वाकल्याने बचावले. त्यानंतर हल्लेखोरांनी दुसऱ्यांदा गोळी झाडण्याचा केलेला प्रयत्न फसला. या प्रकरणी पुंडलिकनगर पोलिस ठाण्यात गुन्हा दाखल झाला.
महापालिकाचे सेवानिवृत्त सफाई कामगार प्रभू उर्फ प्रभाकर आनंदा आहिरे (रा. हनुमाननगर) यांच्यावर दोन हल्लेखोरांनी गोळीबार केल्याची घटना ३१ जुलै रोजी सायंकाळी साडेचारच्या सुमारास घडली होती. प्रभाकर घरात पत्नी व मुलांसह असताना दोन हल्लेखोर घरात आले आणि त्यांनी फिर्यादीच्या दिशेने गावठी कट्ट्याने गोळी झाडली होती. फिर्यादी खाली वाकल्याने बचावले. त्यानंतर हल्लेखोरांनी दुसऱ्यांदा गोळी झाडण्याचा केलेला प्रयत्न फसला. या प्रकरणी पुंडलिकनगर पोलिस ठाण्यात गुन्हा दाखल झाला.
या प्रकरणाचा तपास पुंडलिकनगर पोलिसांसह गुन्हे शाखेचे पथकाद्वारे सुरू होता. पोलिसांनी सराईत गुन्हेगारांसह अन्य संशयितांना ताब्यात घेऊन चौकशी केली. परंतु तपास पुढे जात नव्हता. दरम्यान, फिर्यादी प्रभाकर यांची तीन लग्ने झाली आहेत. त्यापैकी पहिली पत्नी मृत झाली आहे. पहिल्या पत्नीपासून फिर्यादीला तीन मुले आणि दोन मुली आहेत. तर प्रभाकर सध्या तिसऱ्या पत्नी आणि मुलांसह हनुमाननगर येथे राहत असल्याची माहिती मिळाल्यावर घटनेमागे घरगुती कारण तर नाही ना या दिशेनेही पोलिसांनी तपासाची चक्रे फिरवली. या वेळी गुप्त बातमीदार; तसेच तांत्रिक माहितीच्या आधारे प्रभाकर यांच्यावर गोळी झाडणारे सचिन अंभोरे आणि नंदकिशोर अंभोरे-देशमुख असल्याची माहिती पोलिसांना मिळाली. सचिन अंभोरे गुजरातमध्ये पळून जाण्याच्या तयारीत असल्याची माहिती मिळताच त्याच्या मागावर असलेल्या गुन्हे शाखेच्या पोलिसांनी त्यास नवापूर (जि. नंदुरबार) येथून ताब्यात घेतले. नंदकिशोर अंभोरे यास कमळापूर शिवारात पकडले. चौकशीत त्या दोघांनी प्रभू आहिरे यांच्या पहिल्या पत्नीचा मुलगा महादू आहिरे याने दीड लाख रुपयांमध्ये वडिलांना जिवे मारण्याची सुपारी दिल्याची कबुली दिली. सुपारीचे ५५ हजार रुपये आगाऊ रक्कम म्हणून दिले होते, असेही त्यांनी सांगितले. त्या आधारे पुंडलिकनगर पोलिसांनी मुख्य संशयित आरोपी आणि फिर्यादीचा मुलगा महादू आहिरे याच्या मुसक्या चिंचोली येथे आवळल्या.
वडिलांवर होता राग
प्रभाकर आहिरे यांनी पहिली पत्नी मृत झाल्यावर मुलगा महादू आणि त्याच्या भावंडांचा सांभाळ केला नाही. पहिल्या पत्नीचे अपत्य असूनही महापालिकेत नोकरीबाबत प्रभाकर यांनी महादूचे नामनिर्देशन केले नव्हते; तसेच सेवा निवृत्तीनंतर मिळालेल्या आर्थिक लाभातूनही वडिलांनी मदत केली नाही. याचा राग महादूच्या मनात होता; तसेच वडील मेल्यानंतर त्यांच्या जागी महापालिकेत नोकरी लागेल, या आशेपोटी त्याने वडील प्रभाकर आहिरे यांना जिवे मारण्यासाठी सचिन व नंदकिशोर यांना दीड लाख रुपयांची सुपारी दिल्याची कुबलीही चौकशीत दिल्याचे पोलिस आयुक्त लोहिया व उपायुक्त शिलवंत नांदेडकर यांनी परिषदेत बोलताना सांगितले. गुन्ह्यात वापरलेले पिस्तुल कुठून आणले, याचा शोध सुरू आहे. ही कारवाई पोलिस आयुक्त लोहिया, उपायुक्त नांदेडकर, सहायक पोलिस आयुक्त धनंजय पाटील, रणजित पाटील, पोलिस निरीक्षक राजश्री आडे, रणजित पाटील यांच्या मार्गदर्शनाखाली गुन्हे शाखा व पुंडलिकनगर पोलिसांनी केली.