किरीट सोमय्या यांच्या व्हायरल व्हिडीओच्या प्रकरणाचे पडसाद मंगळवारी राज्य विधिमंडळाच्या पावसाळी अधिवेशनात उमटले. शिवसेना (उद्धव बाळासाहेब ठाकरे) गटाने सोमय्या यांच्याविरोधात आक्रमक पवित्रा घेऊन त्यांच्याविरोधातली आतापर्यंतची सगळी भडासच काढली. विरोधी पक्षनेते अंबादास दानवे यांनी तर २० मिनिटांच्या आक्रमक भाषणात सोमय्यांच्या राजकारणाची स्टाईल सांगताना त्यांच्या कथित व्हिडीओ बॉम्बची पोलखोल केली. आठ तासांचे व्हिडिओ माझ्याकडे आहेत. ही व्यक्ती ‘सेक्स्टॉर्शन’ करीत असून, असे उपरे दलाल महाराष्ट्रात येतात आणि महिलांना त्रास देतात,’ असा गंभीर आरोप दानवे यांनी केला. तर सोमय्या यांची सुरक्षा तत्काळ काढून घ्या, अशी मागणी अनिल परब यांनी केली. ठाकरे गटाच्या सदस्यांच्या आक्रमक पवित्र्यानंतर गृहमंत्री फडणवीस यांनी उच्चस्तरीय चौकशीचे आदेश दिले. फडणवीसांच्या घोषणेनंतर मुंबई पोलिसांची टीम लगोलग कामाला लागली आहे.
मुंबई पोलीस कामाला लागले, किरीट सोमय्यांची धाकधूक वाढली!
गृहमंत्री देवेंद्र फडणवीस यांच्या चौकशीच्या आदेशानंतर मुंबई पोलिसांच्या मुंबई गुन्हे शाखेने तपास सुरू केला आहे. मुंबई गुन्हे शाखा युनिट १० व्हिडिओच्या सत्यतेचा तपास करणार आहे. या प्रकरणाचा तपास करण्यासाठी गुन्हे शाखेचे अधिकारी, तांत्रिक तज्ज्ञ आणि सायबर टीमची मदत घेणार आहेत. विधानपरिषदेत हा मुद्दा उपस्थित झाल्यानंतर उपमुख्यमंत्री देवेंद्र फडणवीस यांनी या प्रकरणाच्या चौकशीचे आदेश दिले. त्यानंतर मुंबई पोलीस ॲक्शन मोडमध्ये आले असून त्यांनी तपास सुरू केला आहे. दरम्यान, मुंबई पोलिसांच्या हालचालींनी सोमय्यांची धाकधूक वाढणार आहे.
कुणालाही पाठिशी घालणार नाही, सखोल चौकशी होणार
विरोधी पक्षाच्या आक्रमक पवित्र्यानंतर फडणवीस म्हणाले, ‘विरोधी पक्षाने उचललेला मुद्दा खरंच गंभीर आहे. राजकारणात अनेक प्रसंग येत असतात. सोमय्यांविरोधातल्या तक्रारींबाबत विरोधी पक्षाने माझ्याकडे पुरावे द्यावेत. गृहखाते कुणालाही पाठिशी घालणार नाही. या प्रकरणाची सखोल चौकशी केली जाईल. कुठलंही प्रकरण दाबलं जाणार नाही. या प्रकरणी वरिष्ठ पातळीवर चौकशी केली जाईल, अशी ग्वाही फडणवीसांनी सभागृहात दिली.