धुळे: शिरपूर तालुक्यातील गुऱ्हाळपाणी ग्रुप ग्रामपंचायत अंतर्गत असलेल्या थुवानपाणी येथे रस्त्याची सोय नसल्याने थुवानपाणी येथील एका महिलेला चक्क बांबूंना फडके बांधून त्याची झोळी करुन तीन किलोमीटर अंतरावरील गुऱ्हाळपाणी येथे नेण्यात आल्याचा प्रकार काल घडला. या महिलेला गुऱ्हाळपाणी आरोग्य केंद्रात दाखल करण्यात आले आहे.
शिरपूर तालुक्यातील उत्तरेला मध्यप्रदेश सीमेवरील दुर्गम डोंगराळ क्षेत्रात नागरिकांना अनेक समस्यांना तोंड द्यावे लागत आहे. गुऱ्हाळपाणी ग्रुप ग्रामपंचायत अंतर्गत येणाऱ्या थुवानपाणी व निशाणपाणी या दुर्गम क्षेत्रात येण्याजाण्यासाठी पक्का रस्ता नसल्याने नागरिकांचे प्रचंड हाल होत आहेत. गावातील लालबाई मोतीराम पावरा या महिलेला प्रसूतीकळा येऊ लागल्याने प्रसूतीसाठी रुग्णालयात नेण्यासाठी नातेवाइकांना तारेवरची कसरत करावी लागली. यावेळी नातेवाइकांनी बांबूची झोळी बनवून त्यात गरोदर महिलेला टाकून निशाणपाणी ते थुवाणपाणी आणि थुवाणपाणी ते गुऱ्हाळपाणी हे तीन किलोमीटरचे अंतर पायपीट करत आणण्यात आले.
शिरपूर तालुक्यातील उत्तरेला मध्यप्रदेश सीमेवरील दुर्गम डोंगराळ क्षेत्रात नागरिकांना अनेक समस्यांना तोंड द्यावे लागत आहे. गुऱ्हाळपाणी ग्रुप ग्रामपंचायत अंतर्गत येणाऱ्या थुवानपाणी व निशाणपाणी या दुर्गम क्षेत्रात येण्याजाण्यासाठी पक्का रस्ता नसल्याने नागरिकांचे प्रचंड हाल होत आहेत. गावातील लालबाई मोतीराम पावरा या महिलेला प्रसूतीकळा येऊ लागल्याने प्रसूतीसाठी रुग्णालयात नेण्यासाठी नातेवाइकांना तारेवरची कसरत करावी लागली. यावेळी नातेवाइकांनी बांबूची झोळी बनवून त्यात गरोदर महिलेला टाकून निशाणपाणी ते थुवाणपाणी आणि थुवाणपाणी ते गुऱ्हाळपाणी हे तीन किलोमीटरचे अंतर पायपीट करत आणण्यात आले.
निशाणपाणी ते थुवाणपाणी व थुवाणपाणी ते गुऱ्हाळपाणी डांबरी रस्ता नसल्याने येथे रुग्णवाहिका पोहोचत नसल्याने सदर महिलेला निशाणपाणी ते थुवाणपाणी असा तीन किलोमीटर तसेच थुवाणपाणी आणि गुऱ्हाळपाणी तीन किलोमीटर असे एकूण सहा किलोमीटरचा रस्ता झोळीत पार करण्यात आला. त्यानंतर तेथून या महिलेला गुऱ्हाळपाणी येथून रुग्नवाहिकेने वकवाड येथील प्राथमिक आरोग्य केंद्रात दाखल करण्यात आले. महिलेची सुरक्षितरित्या डिलीव्हरी होऊन बाळ आणि महिलेची प्रकृती ठीक असल्याचे सांगण्यात आले. याप्रसंगी ग्रा.पं. सदस्य गुलबा पावरा, सिकना पावरा, कावसिंग पावरा, आशा सेविका सुरमीबाई पावरा, सतीलाल पावरा यांनी या महिलेला झोळीने आणण्यास सहकार्य केले.
जि.प. सीईओंच्या भेटीनंतरही गावकऱ्यांचे हालच:
तीन ते चार महिन्यांपूर्वी धुळे जिल्हा परिषदेचे मुख्य कार्यकारी अधिकारी भुवनेश्वरी. एस यांनी या क्षेत्राला भेट दिली होती. त्यावेळी त्यांना देखील थुवाणपाणी पर्यंत पायीचालत यावे लागले होते, त्यावेळी ग्रामस्थांनी त्यांना रस्त्याची मागणी केली होती. मात्र अद्यापही रस्त्याबाबत काही कारवाई न झाल्याने नागरिकांची प्रतीक्षा कायमचं आहे. या दुर्गम भागात रस्त्याची सुविधा पुरवावी, अशी मागणी आता येथील रहिवासी करीत आहे.
रस्त्याची सुविधा पुरवा:
गुऱ्हाळपाणी ग्रुप ग्रामपंचायतीअंतर्गत दहा ते बारा खेडी येतात. आम्ही गेल्या कित्येक वर्षांपासून रस्त्याची मागणी करत आहोत. मात्र, आमचे प्रश्न कोणीही गांभीर्य घेतलेले नाही. या क्षेत्रात रस्त्याची सुविधा पुरविण्यात याव्यात अशी मागणी गुऱ्हाळपाणीचे माजी ग्रामपंचायत सदस्य राजेंद्रसिंग पावरा यांनी दिली.
“१४मे २०२० रोजी अश्याच प्रकारची घटना थुवाणपाणी येथे घडली होती. १५ मे २०२० रोजी ही घटना अनेक वृत्तपत्रांमध्ये छापल्यामुळे विद्यमान आमदार काशीराम पावरा यांनी गुऱ्हाळपाणी येथे येऊन एका दिवसात एक डॉक्टर व नर्सची नियुक्ती करून हा प्रश्न सोडवला होता. परंतु, त्या घटनेला तीन वर्ष उलटूनही थुवानपाणी आणि निशाणपाणी येथे रस्त्याची सोय न झाल्यामुळे आज पुन्हा एका महिलेला झोळीत दवाखान्यात आणण्यात आले”. अशी प्रतिक्रिया त्यांनी दिली.