पंतप्रधान मोदी यांच्या नेतृत्वाखाली आत्मनिर्भर भारत या संकल्पनेअंतर्गत देशाने प्रगतीची नवी शिखरे सर केली आहेत. देशवासीयांमध्ये त्यांनी राष्ट्रप्रेमाची भावना जागृत करुन देशाला जागितक पटलावर महत्त्वाचे स्थान मिळवून दिले आहे. या कार्यासाठी ट्रस्टच्या विश्वस्तांनी मोदींच्या नावाची या पुरस्कारासाठी एकमताने निवड केली आहे. या सोहळ्यासाठी प्रमुख पाहुणे म्हणून ज्येष्ठ नेते शरद पवार यांना निमंत्रित करण्यात आल्याचे रोहित टिळक यांनी सांगितले.

PM मोदींना लोकमान्य टिळक पुरस्कार देण्यास काँग्रेसचा तीव्र विरोध, थेट राहुल गांधींकडे तक्रार
या कार्यक्रमासाठी महाराष्ट्राचे राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार, ट्रस्टचे विश्वस्त सुशीलकुमार शिंदे हे देखील उपस्थित राहणार असल्याचे रोहित टिळक म्हणाले. कार्यक्रमाची वेळ लवकरच जाहीर केली जाईल. स्मृतिचिन्ह, मानपत्र आणि एक लाख रुपये असे या पुरस्काराचे स्वरुप आहे.

काँग्रेसने केला विरोध

‘पंतप्रधान नरेंद्र मोदी यांचे विचार लोकमान्य टिळक यांच्या विचारांशी कधीपासून जुळायला लागले,’ असा सवाल उपस्थित करून शहर आणि प्रदेश काँग्रेसने थेट काँग्रेस नेते राहुल गांधी यांच्याकडेच डॉ. रोहित टिळक यांच्याविषयी तक्रारीचा सूर आळवला आहे. या पुरस्कारासाठी मोदींच्या नावाची घोषणा होण्याआधीच ही तक्रार करण्यात आली. रोहित टिळक काँग्रसचे पदाधिकारी होते; तसेच त्यांनी यापूर्वी काँग्रेसकडून कसबा विधानसभेची निवडणूकही लढवली होती. टिळक कुटुंबियांचा काँग्रेसने कायमच सन्मान राखल्याचा दावा करून प्रदेश काँग्रेसने या पुरस्काराविषयी नाराजी वर्तविली आहे. त्यामुळे पंतप्रधानांचा पुणे दौरा चर्चेचा ठरण्याची दाट शक्यता आहे. (काँग्रेसच्या विरोधाची सविस्तर बातमी वाचण्यासाठी येथे क्लिक करा.)

आतापर्यंत एस.एम.जोशी, इंदिरा गांधी, अटल बिहारी वाजपेयी, डॉ.मनमोहन सिंग, प्रणव मुखर्जी, शंकरदयाळ शर्मा, बाळासाहेब देवरस, खान अब्दुल गफारखान, शरद पवार, एन आर नारायणमूर्ती, जी माधवन नायर, डॉ.कोटा हरिनारायण, राहुल बजाज, बाबा कल्याणी, ई.श्रीधरन, एमएस. स्वामीनाथन, डॉ.वर्गीस कुरियन अशा विविध क्षेत्रातील दिग्गजांना या पुरस्काराने गौरविण्यात आले आहे.