म. टा. विशेष प्रतिनिधी, मुंबई: मान्सूनचे वारे पुन्हा सक्रीय झाल्यानंतर अवघ्या २४ तासांमध्ये मान्सूनने महाराष्ट्रासह मध्य प्रदेश, उत्तर प्रदेश पार करत दिल्लीपर्यंत झेप घेतली. तसेच गुजरात, राजस्थानच्या काही भागांमध्येही मान्सून रविवारी दाखल झाला. मुंबई आणि दिल्लीमध्ये तब्बल ६२ वर्षांनी मान्सून एकत्र दाखल झाला आहे. मुंबईमध्ये दोन आठवडे विलंबाने, तर दिल्लीमध्ये मात्र दोन दिवस आधी मान्सून दाखल झाला आहे.
शनिवारी सकाळी ८.३० ते रविवारी सकाळी ८.३० या वेळेत मुंबईमध्ये सांताक्रूझ येथे १७६.१ मिलीमीटर, तर कुलाबा येथे ८६ मिलीमीटर पावसाची नोंद झाली. मान्सून आगमनाच्या निकषांची पूर्तता झाल्याने मुंबईमध्ये मान्सूनचे आगमन झाल्याचे भारतीय हवामान विभागातर्फे रविवारी जाहीर करण्यात आले.
शनिवारी सकाळी ८.३० ते रविवारी सकाळी ८.३० या वेळेत मुंबईमध्ये सांताक्रूझ येथे १७६.१ मिलीमीटर, तर कुलाबा येथे ८६ मिलीमीटर पावसाची नोंद झाली. मान्सून आगमनाच्या निकषांची पूर्तता झाल्याने मुंबईमध्ये मान्सूनचे आगमन झाल्याचे भारतीय हवामान विभागातर्फे रविवारी जाहीर करण्यात आले.
मुंबईच्या विविध भागांमध्ये रविवारी सकाळीही पावसाने उपस्थिती लावली. त्यानंतर मात्र जोर कमी झाला. दुपारच्या सुमारास सांताक्रूझ, खार, जुहू, वर्सोवा या भागात संततधार असल्याची माहिती स्थानिकांनी दिली, मात्र या पावसाचा जोर फारसा नव्हता. मुंबईत सांताक्रूझ येथे रविवारी सकाळी ८.३०पासून सायं. ५.३०पर्यंत केवळ १७.८ मिलीमीटर पावसाची नोंद झाली. तर, कुलाबा येथे ३४ मिलीमीटर पावसाची नोंद झाली. शनिवारी दिवसभर पडलेल्या पावसाचा परिणाम म्हणून मुंबईच्या कमाल तापमानात शनिवारपेक्षा घट नोंदली गेली. सांताक्रूझ येथे शनिवारपेक्षा ३.८ अंशांनी तापमान खाली उतरून २९ अंश सेल्सिअस, तर कुलाबा येथे ३.३ अंशांनी तापमान खाली उतरून २७.५ अंश सेल्सिअस कमाल तापमान रविवारी नोंदले गेले. दोन्ही केंद्रांवर किमान तापमानाचाही पारा उतरला आहे. रविवारी सांताक्रूझ येथे २३.६, तर कुलाबा येथे २४ अंश सेल्सिअस किमान तापमानाची नोंद झाली.
– मुंबईमध्ये ११ जून ही मान्सून दाखल होण्याची सर्वसाधारण तारीख
– सन २०१९मध्येही सन २०२३प्रमाणे २५ जूनला मान्सून दाखल झाला होता
– सन २००९मध्ये २१ जून, सन २०१६मध्ये २० जून, तर सन २००५मध्ये १९ जूनला मान्सून मुंबईमध्ये दाखल
– गेल्या वर्षी ११ जूनला, सन २०२१मध्ये ९ जूनला आणि सन २०२०मध्ये १४ जूनला मान्सून मुंबईमध्ये दाखल
रविवारचा ऑरेंज अलर्ट मागे
रविवारसाठी ऑरेंज अलर्ट देण्यात आला होता. मात्र सकाळपासून मुंबईत पावसाचा जोर फारसा नव्हता. त्यानंतर दुपारी अद्ययावत इशारा देत ऑरेंज अॅलर्ट मागे घेण्यात आला. पूर्वमोसमी पावसासाठीची प्रणाली ही उष्णतेमुळे निर्माण होणाऱ्या ढगांमधून कोसळणाऱ्या पावसासारखी असते. मान्सून प्रणालीमध्ये पाऊस अधिक काळ टिकणारा असतो. त्याची तीव्रता कमी असते, अशी माहिती निवृत्त हवामान विभाग अधिकारी माणिकराव खुळे यांनी दिली. मुंबईमध्ये मान्सून दाखल झाला आहे. त्यामुळे हा जोर कमी झाला असावा, असा अंदाज व्यक्त करण्यात येत आहे.
राज्यभरात पावसाला चालना
बंगालच्या उपसागरात कमी दाबाचे क्षेत्र असून हे क्षेत्र उत्तर ओडिशा आणि झारखंडच्या दिशेने प्रवास करत आहे. तसेच महाराष्ट्राच्या किनाऱ्यापासून कर्नाटकच्या किनाऱ्यापर्यंत ढगांची द्रोणीय स्थिती निर्माण झाली आहे. ईशान्य अरबी समुद्रात चक्रीय वात स्थिती निर्माण झाली आहे. या पार्श्वभूमीवर मान्सून सक्रीय राहणार आहे.