मिळालेल्या माहितीनुसार, बोपोडी येथील ४० वर्षीय महिला गेल्या तीन वर्षापासून गळ्याभोवती वाढत असलेल्या गाठीमुळे त्रस्त होत्या. वाढत असलेल्या गाठीमुळे बोलतांना त्रास होणे, श्वास घेण्यास अडचण येणे तसेच खाताना त्रास होणे या प्रकारचा त्रास त्यांना होत होता. आजारातून सुटका मिळावी म्हणून त्यांनी अनेक ठिकाणी उपचार घेतले. मात्र, त्रास कमी होत नव्हता. आर्थिक परिस्थिती पाहता त्यांना खासगी रुग्णालयात उपचार घेणे शक्य नसल्याने त्यांनी पिंपरी येथील महापालिकेच्या यशवंतराव चव्हाण स्मृती रुग्णालयातील पदव्युत्तर संस्थेच्या शस्त्रक्रिया विभागातील डॉ. संतोष थोरात यांना दाखवले. डॉक्टरांनी तपासणी करुन त्यांना दाखल करुन घेतले.

त्यानंतर गळ्याचे सिटी स्कॅन तसेच थॉयरॉईडसाठी लागणारे रक्त तपासणी करण्यात आली. सर्व तपासणी झाल्यावर त्यांना गलगंड असल्याचे निदान झाले. रुग्णाला होत असलेला त्रास बघता त्यांना शस्त्रक्रिया करण्यापूर्वी वेगवेगळी आरोग्य वर्धक औषधे चालू करण्यात आली. मानेजवळ असलेले महत्त्वाचे घटक आणि संभाव्य़ धोक्याबद्दलची माहिती रुग्णाच्या नातेवाईकांना देण्यात आली. नातेवाईकांची परवानगी घेऊन रुग्णावर शस्त्रक्रिया करण्यात आली. सामान्यतः थायरॉईड ग्रंथीचे वजन साधारणतः १८ ते २० ग्रॅम असते. या शस्त्रक्रियेमध्ये काढण्यात आलेली ग्रंथी अर्धा किलो वजनांची निघाली आहे. शरीरामध्ये योग्य प्रमाणात आयोडीन न मिळाल्यास गलगंड हा आजार होतो, असे डॉक्टरांनी सांगितले.