मुंबई : भारतातील पहिल्या महिला गुप्तहेर म्हणून ख्याती असलेल्या ‘लेडी जेम्स बाँड’ रजनी पंडित यांनी एक रोमांचकारी किस्सा सांगितला. आधीच लग्न झालं असताना एका पत्रकाराच्या बहिणीला फसवून दुसरं लग्न करणाऱ्या शिक्षकाचा पर्दाफाश कसा केला, हे रजनी पंडित यांनी सांगितलं. पंडित यांच्या मुलाखतीतील या किश्श्याचा व्हिडिओ सोशल मीडियावर व्हायरल झाला आहे.
काय आहे किस्सा?
एका पत्रकाराच्या बहिणीचं लग्न झालं होतं, पण त्यांना पत्र आलं होतं, की तुमच्या ताईने ज्याच्याशी लग्न केलंय, त्याचं आधीच एक लग्न झालेलं आहे. तुम्ही लग्न करताना चौकशी केली नाहीत का? हे पत्र वाचून त्यांना शॉक बसला. त्यांच्या पायाखालची जमीनच सरकली. एकुलता एक मुलगा आहे म्हणून त्यांनी बहिणीचं लग्न लावून दिलं होतं, असं रजनी पंडित यांनी सांगितलं.
“त्यांनी मला विचारलं की काम कराल का? मी त्यांना म्हटलं, तुमच्या बहिणीचा हा नवरा किती वाजता निघतो? ते कुठल्या गावचे आहेत? ते म्हणाले आम्हाला काहीच माहिती नाही. इथे तो डोंबिवलीला राहतो, शिक्षक म्हणून कामाला आहे. आता त्याची ओळख कशी काढायची, गावचा पत्ता कसा काढायचा, हा विचार मी करु लागले” रजनी पंडित पुढे सांगत होत्या.
“ट्रेनमध्ये बोलता-बोलता मी त्यांना म्हटलं, तुम्ही कुठले आहात? कुठल्या शाळेत शिकवता? मी पण लहानच होते, म्हटलं मीही कॉलेजला लांबून जाते. मी डोंबिवली-दादर ट्रेनने प्रवास सुरु केला. बोलता बोलता त्यांनी गावाचं नाव उच्चारलं. मग मी आणि माझा भाऊ तिथे गेलो. बघितलं तर त्यांचं लग्न झालं होतं, त्यांना दोन मुलं होती, आई वडील होते. पण त्यांच्याशी पटत नसल्यामुळे तो मुंबईला येऊन राहिला होता. एवढ्या मोठ्या मुंबईत आपल्याला कोण शोधेल असं त्याला वाटलं असावं, पण त्याची चोरी पकडली गेली” असा रोमांचकारी किस्सा भारतातील पहिल्या महिला गुप्तहेर रजनी पंडित यांनी सांगितला.
प्रयोग सुरु असतानाच ‘ती’ झोपली, प्रशांत दामले स्टेजवरुनच उठवू लागले, संकर्षणचा धमाल किस्सा