धरणासाठी जमिनी घेतल्या पण पाण्याची सोय नाही. घोटभर पाण्यासाठी वर्षोनुवर्षे संघर्ष करावा लागत आहे. इगतपुरी तालुक्यातील वाळविहीर गावाला जोडलेल्या बकुळेची वाडी आणि भैरोबावाडीची पाणीटंचाईमुळे भीषण अवस्था आहे.देशाला स्वातंत्र्य मिळून ७५ वर्ष झाली नुकताच याचा अमृत महोत्सव साजरा करण्यात आला. मात्र, या अमृत महोत्सव काळातही येथील महिलांची पाण्यासाठीची पायपीट थांबली नाही. त्यांच्या डोक्यावरील हंड्याचं ओझं अजूनही हलकं होऊ शकलं नाही.

इगतपुरी तालुक्यातील वाळविहीर परिसरात वाकी-खापरी धरण बांधण्यात आले, त्यासाठी येथील शेतकऱ्यांच्या जमीनीही संपादीत केल्या गेल्या परंतू आजही धरणाचे पाणी औरंगाबाद आणि नगरला जाते. त्यामुळे धरणासाठी जमिनी देणाऱ्यांचे घसे आजही कोरडेच आहेत. येथे सध्या दोन बोर (हापसे) आहेत परंतू त्यावर एक हंडा भरण्यासाठी एक तास लागतो. त्यासाठी रात्री नंबरनुसार रांगा लावून पाणी भरावे लागते.

येथील नागरिक चार महिने शेती काम करतात त्यानंतर आठही महिने त्यांना रोजगाराचा दुसरा मार्ग नसतो. या परिसरातील खेडे भैरोबाची वाडी, बकुळेची वाडी , तळ्याची वाडी , पायारवाडी, खडकवाडी, डुब्याची वाडी, असे वाळविहीर या गावाला जोडले आहेत. जवळच असलेल्या खडकवाडी, पायरवाडी, डुब्याचीवाडी येथे डबक्यातील झऱ्यामधून दोन किलोमीटर पाणी वाहण्याची वेळ महिलांवर आली आहे.