पुणे:मावळ विधानसभा मतदारसंघ पुणे जिल्ह्यात असूनही भाजपचा बालेकिल्ला राहिलेला हा मतदारसंघ. जनसंघाचे रामभाऊ म्हाळगी पहिल्यांदा आमदार झाले ते या मावळमधूनच. पण २०१९ च्या विधानसभेला भाजपमधून राष्ट्रवादी काँग्रेस पक्षात आलेल्या सुनिल शेळकेंनी वारं फिरवलं आणि भाजपची हक्काची जागा राष्ट्रवादीकडे खेचुन आणली. आमदार होताच सुनिल शेळकेंनी वर्चस्वाचं राजकारण सेट केलं आणि बालेकिल्ला राहिलेल्या मतदारसंघात भाजपची पिछेहाट झाली. त्याचवेळी मतदारसंघाची बांधणी करण्यासाठी रवींद्र भेगडे नावाचा एक तडफदार नेता मैदानात उतरला. हेच रविंद्र भेगडे आगामी विधानसभेसाठी इच्छुक आहेत. त्यातच भाजपने घेतलेल्या एका निर्णयामुळे रविंद्र भेगडेंचं नाव मावळ विधानसभेसाठी पुन्हा चर्चेत आलंय.
कोण आहेत रविंद्र भेगडे:
रविंद्र भेगडेंची एका वाक्यात ओळख सांगायची झाली तर मावळचे दिवंगत आमदार दिगंबर भेगडेंचे ते पुतणे आहेत. काकांचा वारसा घेऊन रविंद्र भेगडे मावळच्या राजकारणात नशीब आजमावताना दिसतात. मात्र पक्षाने अनेकदा उमेदवारी नाकारल्याने त्यांना आमदारकीसाठी दहा वर्षापासून वेटिंगवर राहावं लागलंय.
भाजप युवा मोर्चातून भेगडेंनी सक्रीय राजकारणाला सुरूवात केली. २००९ ते २०१४ या कालखंडात भाजप युवा मोर्चा मावळ तालुका अध्यक्ष पद त्यांनी भूषवले. तालुकाअध्यक्ष असतानाही त्यांना २०१४ ला विधानसभेची उमेदवारी नाकारण्यात आली. यानंतरही २०१७ ला जिल्हा परिषदेसाठी इच्छुक असताना पुन्हा संधी नाकारली गेली.
अजितदादांचं भाषण झालं नाही, फडणवीस मास्टरमाईंड, सुनिल शेळकेंनी घटनाक्रमच सांगितला
यानंतर भेगडेंनी २०१९ची विधानसभा लढवण्याचा निर्णय घेतला. निवडणुकीच्या दृष्टीने फिल्डिंगदेखील लावली. या वेळेसही पक्षाने त्यांना सबुरीचा सल्ला दिला.
भेगडेंनी विधानसभा लढविण्याचा निर्णय रद्द केला. महाविकास आघाडी सरकारच्या काळात २०२० ला पदवीधर मतदारसंघातून विधानसभेत जाण्याचा भेगडे यांनी प्रयत्न केला पण याही वेळी पक्षादेशामुळे ऐनवेळी माघार घ्यावी लागली. पक्षाकडून कायम डावलण्याचे धोरण अवलंबले जात असतानाच भेगडेंनी सामाजिक कार्य चालू ठेवत मतदारसंघात आपली ताकत निर्माण केली आहे.
बाळा भेगडे माघार घेणार?
२०१९ च्या विधानसभेत राज्यमंत्री असुनही बाळा भेगडेंना मावळची जागा राखता आली नाही. त्यानंतर आमदार झालेल्या सुनिल शेळकेंच्या वर्चस्वाच्या राजकारणाने भाजपची मतदारसंघात मोठी पडझड झाली. त्याचवेळी मावळात भाजपचे हात मजबुत करण्यासाठी रविंद्र भेगडे यांनी जीवाचं रान केलं. २०१९ नंतर रविंद्र भेगडेंनी पक्षाच्या संघटनात्मक बांधणीवर अधिक भर दिला. युवा कार्यकर्त्यांची फौज भाजपसोबत जोडण्याचे प्रयत्न केले. ‘मावळ प्रबोधिनी’ या सामाजिक संस्थेमार्फत शासकीय योजना खेडोपाडी पोहोचविण्याचे काम केले. तसेच मविआ सरकारच्या विरोधात तालुका अध्यक्ष म्हणून रस्त्यावर उतरून संघर्षही केला. याचेच फळ म्हणून रवींद्र भेगडे यांची मावळ विधानसभा निवडणूक प्रमुखपदी निवड करण्यात आली असल्याचे बोलले जात आहे.
Mla Sunil Shelke: आमदार सुनील शेळकेंची अडचण वाढणार?; किरीट सोमय्यांनी केली ‘ही’ मागणी
विधानसभेसाठी इच्छुक असणाऱ्या रविंद्र भेगडेंचीच निवडणुक प्रमुखपदी निवड झाल्याने मावळात भाजपकडून भाकरी फिरवली जाणार असल्याचे संकेत दिल्याची चर्चा आहे. पण सलग दोन टर्म आमदार आणि राज्यमंत्री राहिलेले बाळा भेगडे सहजासहजी माघार घेतील का हे ही पाहणं महत्वाचं असणार आहे. रविंद्र भेगडेंवर मावळमधून उमेदवारी मिळालीच तरी सुनिल शेळकेंसारख्या लोकप्रिय आमदाराला टक्कर देण्याचं आव्हान त्यांच्यासमोर असेल.