म. टा. वृत्तसेवा, चिपळूण : रायगडावर आज होणाऱ्या शिवराज्याभिषेक सोहळ्याच्या सांगता समारंभाची जय्यत तयारी करण्यात आली आहे. मात्र गडावर जाण्यासाठी असणारी रोपे-वेची सेवा नियंत्रित करण्यात आली आहे. जेष्ठ नागरिक, लहान मुले, महिला तसेच पाणी, वैद्यकीय सेवेसाठीच ही सेवा उपलब्ध होणार आहे. शिवभक्तांची गर्दी लक्षात घेऊन रायगड जिल्हा प्रशासनाने हा निर्णय घेतला आहे.राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, पालकमंत्री उदय सामंत, सांस्कृतिक कार्यमंत्री सुधीर मुनगंटीवार यांच्यासह अनेक मंत्री, खासदार, आमदारांच्या उपस्थितीत दोन जून रोजी तिथीप्रमाणे ३५०वा शिवराज्याभिषेक सोहळा झाला होता. यानिमित्त १ ते ६ जून रोजी आयोजित करण्यात आलेल्या विविध समारंभाची आज, मंगळवारी सांगता होत आहे. आज, तारखेनुसार शिवराज्याभिषेक दिन असल्याने राज्यभरातून शिवभक्तांची गर्दी होणे अपेक्षित आहे. यानिमित्त गडावर विविध सांस्कृतिक कार्यक्रमांचे आयोजन करण्यात आले आहे. यासाठी मुख्य कार्यकारी अधिकारी डॉ. किरण पाटील, जिल्हा पोलिस अधीक्षक सोमनाथ घार्गे व प्रशासनातील त्यांचे सर्व सहकारी, विविध विभागांचे अधिकारी-कर्मचारी हा सोहळा यशस्वी होण्यासाठी अहोरात्र अथक परिश्रम घेत आहेत.

या सोहळ्यासाठी जिल्हा प्रशासनाने ३३ समित्यांचे गठन केले असून त्या माध्यमातून गेले दोन महिने या सोहळ्याचे नियोजन सुरू आहे. राज्यभरातून येणाऱ्या पर्यटक आणि शिवभक्तांसाठी गडाच्या पायथ्याशी कोंझर, वालुसरे, पाचाड येथे वाहन पार्किंग व्यवस्था करण्यात आली आहे. एकाच वेळी साडेतीन हजार वाहने या ठिकाणी पार्किंग करता येणार आहेत. उन्हाळ्याचे दिवस असल्याने गडावर काळा हौद येथे दीड लाख लिटर, कोहीम तलाव येथे दीड लाख लिटर, हनुमान टाकी येथे एक लाख लिटर, गंगासागर येथे दीड लाख लिटर, श्रीगोंडा येथे एक लाख लिटर पाण्याची व्यवस्था करण्यात आली आहे. तसेच, शिवभक्तांच्या आरोग्याची काळजी घेण्यासाठी २४ वैद्यकीय पथके सर्व आरोग्य सोयीसुविधांसाह तैनात करण्यात आली आहेत. तसेच, गडावर आणि पायथ्याशी अग्निशमन यंत्रणा सज्ज ठेवण्यात आली आहे. गडावर येण्यासाठी चित्त दरवाजा आणि नाणे दरवाजा असे दोन मार्ग उपलब्ध आहेत.

शिवराज्याभिषेक सोहळा दणक्यातच; शिवभक्तांसोबत संभाजीराजे छत्रपती अन् संयोगीताराजेंची उपस्थिती

हृदयविकार, मधुमेह आणि श्वसनविकार असलेल्या व्यक्तींनी गडावर येणे टाळावे, असे आवाहनही जिल्हा प्रशासनाने केले आहे. तसेच गडावर १०९ ठिकाणी सीसीटीव्ही कॅमेरे बसविण्यात आले असून जवळपास दोन हजार पोलिस अधिकारी-कर्मचाऱ्यांचा बंदोबस्त ठेवण्यात आला आहे. गडावर वैशिष्ट्यपूर्ण आकर्षक रोषणाई करण्यात आली आहे. त्यामुळे रात्रीच्या वेळी स्वराज्याची राजधानी उजळून निघाली आहे.

पिण्याच्या पाण्याची सोय, अन्नछत्र

पायरी मार्गाने जाणाऱ्या प्रत्येक शिवभक्तासाठी अन्नछत्र, पिण्याच्या पाण्याची बाटली तसेच वैद्यकीय सुविधा उपलब्ध करून देण्यात आली आहे. गडावर येणाऱ्या शिवभक्तांसाठी मर्दानी खेळ, शाहिरी अशा विविध सांस्कृतिक कार्यक्रमांचेही आयोजन करण्यात आले आहे. गडावर जाण्यासाठी सरसकट रोप-वे तिकीट विक्री बंद ठेवण्यात आली आहे. गडावर असलेल्या पाणीटंचाईमुळे रोप-वेचा वापर फक्त पाणी वाहतुकीसाठी व शासकीय वापरासाठी करण्यात येत आहे.