मॉइलची एक कोटी ३५ लाख रुपयांनी फसवणूक केल्याप्रकरणात सीबीआयने गजलेवार, त्यांच्या पत्नीच्या मालकीच्या धरमपेठेतील भगवाघर लेआउट येथील मेसर्स इझिकॉम सोल्युशन, जरीपटक्यातील बेझनबाग येथील मेसर्स इकोटेक सर्व्हिसेस व अन्य व्यक्तींविरुद्ध गुन्हे दाखल दाखल केले. सीबीआयच्या विविध पथकांनी बुधवारी सचिन यांचे निवासस्थान व अन्य ठिकाणी छापे टाकले. पथकाने सचिन यांच्या निवासस्थानाहून मोठ्या प्रमाणात प्रकरणाशी दस्तऐवज जप्त केले. सीबीआयच्या सूत्रांनी दिलेल्या माहितीनुसार, पथकाने धमरपेठ व बेझनबाग येथील कार्यालयांची पाहणी केली. मात्र, या परिसरातील कंपन्यांचे कोणतेही कार्यालय आढळून आले नाही. कागदावरच या कंपन्यांचे पत्ते असल्याचेही सीबीआयला आढळले.
सचिन यांनी पत्नीच्या नावे कंपन्या स्थापन केल्या. या कंपन्यांच्या माध्यमातून मॉइलला लागणाऱ्या इलेक्ट्रॉनिक उपकरणांची खरेदी करण्यात आली. बाजारभावापेक्षा दुप्पट दराने दरानेही उपकरणे पुरविण्यात आली. या सर्व उपकरणांचे बिल मंजूर करण्याचे अधिकार सचिन यांच्याकडे होते. त्यांनीच सर्व बिले मंजूर केली. तसेच खरेदीसाठी समितीची परवानगीही त्यांनी घेतली नसल्याचे सीबीआयच्या तपासादरम्यान समोर आले. सीबीआयला आढळलेल्या अनेक दस्तऐवजांवर बनावट स्वाक्षरीही असल्याचे दिसून आले. नोव्हेंबर २०१९ ते जानेवारी २०२२ या काळात कंपनीने हे व्यवहार केला. या संशयास्पद व्यवहाराची माहिती मॉइलच्या दक्षता पथकाला मिळाली. दक्षता पथकाने या व्यवहाराची संपूर्ण चौकशी करीत सचिन व संबंधित कंपन्यांविरुद्ध गुन्हा दाखल करण्याची परवानगी संबंधित मंत्रालयाला मागितली. मंत्रालयाने मंजुरी दिल्यानंतर दक्षता पथकाच्या अधिकाऱ्याने सीबीआयच्या लाचलुचपत प्रतिबंधक विभागाकडे तक्रार केली. त्यानंतर सीबीआयने गुन्हे दाखल करून छापे टाकले होते.
मिळकतीपेक्षा अधिक संपत्तीही
व्यवस्थापकपदी असताना सचिन यांनी मिळकतीपेक्षा (पगारापेक्षा) अधिक चल-अचल संपत्ती गोळा केली. यामध्ये कार, फ्लॅट व अन्य महागड्या वस्तूंचा समावेश आहे. या दस्तऐवजांच्या आधारे सचिन यांच्याविरुद्ध मिळकतीपेक्षा अधिक संपत्ती गोळा केल्याचा गुन्हाही दाखल होण्याची शक्यता सीबीआयच्या सूत्रांनी वर्तवली.