‘भारतात एकूण तेलापैकी सर्वाधिक वापर पामतेलाचा असतो. हे पामतेल मलेशिया व इंडोनेशियाहून आयात करावे लागते. मागील दीड ते दोन वर्षांपासून आयात महागल्याने पामतेल महाग होऊन त्याचा परिणाम अन्य सर्वच खाद्यतेलांवर झाला होता. आता यंदा मलेशियात पामच्या उत्पादनात नऊ टक्क्यांची मोठी वाढ झाल्याने आयात स्वस्त होणार आहे. त्याचवेळी भारतातही पामतेल वापरात काही प्रमाणात घट झाल्याने आयातीची गरज कमी झाली आहे. दुसरीकडे युक्रनमध्ये सूर्यफुल तेलबियांचे विक्रमी उत्पादन होऊ घातले आहे. युद्धादरम्यान अडकलेला जुना साठा संपविण्यासाठी मिळेल त्या दरात युक्रेनेकडून तेलबियांची निर्यात होत आहे. या सर्व स्थितीत येत्या काळात खाद्यतेल स्वस्त होणार असे स्पष्ट संकेत आहेत’, असे अखिल भारतीय खाद्यतेल असोसिएशनचे अध्यक्ष शंकर ठक्कर यांनी सांगितले.

भारत हा जगातील सर्वाधिक तेल वापरकर्ता देश आहे. भारतात दरवर्षी २.२० कोटी टन खाद्यतेलाचा वापर होतो. एकूण मागणीच्या ७० टक्के तेल आयात केले जाते. त्यामध्ये निम्म्याहून अधिक पामतेल तर आयातीपैकी जवळपास २५ टक्के खाद्यतेल सूर्यफुलाचे असते. हे सूर्यफुल सर्वाधिक युक्रेन, रशिया व अर्जेंटिना येथून आयात केले जाते.
प्रश्न विचारल्यावर मोदींचा ‘मिस्टर इंडिया’; कॉंग्रेस प्रवक्त्या अनुमा आचार्य यांचा खरमरीत टोला
शेंगदाण्याचा थोडा फटका

पाम व सूर्यफुल तेल स्वस्ताईचे संकेत असले तरी शेंगदाणा तेल इतक्यात स्वस्त होण्याची शक्यता कमी आहे. यंदाच्या रब्बी मोसमानुसार देशात १४.७४ लाख टन शेंगदाणा पीकाची शक्यता असून त्यात मागीलवर्षीपेक्षा २.२६ लाख टनाची घट आहे. तर उन्हाळी पिकातही जवळपास १ लाख टनाची घट आहे. यामुळेच मागीलवर्षी या काळात ६५०० रुपये प्रति क्विंटल असलेला दर आता ८ हजार रुपये प्रति क्विंटल झाला आहे. याचा परिणाम देशांतर्गत शेंगदाणा तेलावर होईल, असे खाद्यतेल महासंघाचे म्हणणे आहे.