पुणे: मी पंतप्रधान पदाच्या शर्यतीत नाही, अशी माहिती स्वत: राष्ट्रवादी काँग्रेसचे सर्वेसर्वा शरद पवार यांनी आज दिली आहे. मात्र शरद पवार यांच्या वयाप्रमाणे, असा शब्द कधी माझ्याबाबत उच्चरू नका, असा सल्ला देखील त्यांनी पत्रकारांना दिला. पवारांच्या या वक्तव्यानंतर त्यांचे पंतप्रधान बनण्याचं स्वप्न हे स्वप्नच राहील का? अशी एक चर्चा राजकीय वर्तुळात सुरू झाली आहे.पुण्यातील बालगंधर्व रंग मंदिरात कुलगुरू राम ताकवले यांच्या शोक सभेच्या कार्यक्रमासाठी शरद पवार आले होते. त्यावेळी त्यांनी पत्रकारांनासोबत विविध विषयांवर चर्चा केली. देशभरात भारतीय जनता पार्टीची सत्ता उलटून टाकण्यासाठी शरद पवार हे सगळीकडे भाजप विरोधी पक्षांची मूठ बांधत आहेत. हे करत असताना शरद पवार यांची पंतप्रधानपदासाठी दावेदार असल्याची चर्चा ही सुरू आहे. परंतु आज त्यानी या चर्चेला पूर्ण विराम दिला.
पत्रकारांनी प्रश्न विचारला की, तुम्ही पंतप्रधान पदाच्या दावेदार असणार का? यावर शरद पवार यांनी उत्तर दिले की, अजिबात नाही. आम्हला या देशात स्थिर आणि विकासाला प्रोत्साहित करणार नेतृत्व हवे आहे, उद्या जनतेने उत्तम प्रकारची साथ दिली, शक्ती दिली तर आम्ही मार्ग काढू. माझ्या सारख्याची जबाबदारी आहे की, त्याना साथ देणे, शक्ती देणे आणि ते मागतील तिथे मदत देणे. शरद पवारांच्या या उत्तराने त्यांनी पुन्हा किंग मेकारची भूमीका निभवण्याचा ठरवले आहे की काय अशी चर्चा सुरू आहे.पंतप्रधान पदाच्या दावेदारीबाबत उत्तर देण्यापूर्वी त्यांनी माझ्या वयानुसार असा शब्द कधी माझ्यासाठी वापरू नका, असा सूचक सल्ला देखील दिला. त्यांच्या या उत्तरानंतर पत्रकार परिषदमध्ये एकच हशा पिकला.
