पुणे जिल्ह्यात १३ तालुक्यांतील ग्रामपंचायत क्षेत्रातील एकूण १,४४० होर्डिंग आहेत. जिल्ह्यात केवळ २७ होर्डिंग परवानगी घेऊन उभारण्यात आले आहेत. १,३७० होर्डिंग आता विनापरवानगी उभारले असून, आतापर्यंत २३ होर्डिंगचे ‘स्ट्रक्चरल ऑडिट’ झाले आहे. जिल्ह्यात उभारलेल्या होर्डिंगपैकी १,२३० होर्डिंगचे स्ट्रक्चरल ऑडिट केलेले नाही, अशी माहिती जिल्हा परिषदेला मिळालेल्या अहवालात देण्यात आली आहे. जिल्ह्यात उभारलेल्या एकूण होर्डिंगपैकी ८७ होर्डिंग धोकादायक असल्याचे समोर आले आहे. कारवाईच्या भीतीने २७ होर्डिंग काढून टाकण्यात आले आहेत.

होर्डिंगवर कारवाई काय?

– जिल्ह्यातील विनापरवाना उभारलेल्या एकूण १,३७० होर्डिंगपैकी सुमारे एक हजार होर्डिंगच्या मालकांना नोटिसा देण्याची कारवाई केली आहे.

– ‘स्ट्रक्चरल ऑडिट’ न झालेल्या ८२५; तसेच धोकादायक असलेल्या ४१ होर्डिंगच्या मालकांनाही नोटिसा देण्याची कारवाई प्रशासनाने केली आहे.

‘तात्पुरत्या होर्डिंगची यादी तयार’

याबाबत जिल्हा परिषदेचे मुख्य कार्यकारी अधिकारी आयुष प्रसाद म्हणाले, ‘पुणे जिल्ह्यात होर्डिंगच्या ‘स्ट्रक्चरल ऑडिट’बाबत तपासणी मोहीम राबवली होती. त्यावर कायमस्वरूपी होर्डिंगचे स्ट्रक्चरल ऑडिट झाले आहे, की नाही, याची विचारणा करण्यात आली. तात्पुरत्या स्वरूपात लावण्यात येणाऱ्या होर्डिंगची यादी जिल्हा परिषदेने तयार केली आहे. मान्सूनपूर्व तयारी सुरू केली असून, त्यात धोकादायक होर्डिंग काढण्याच्या सूचना दिल्या आहेत. जिल्हा परिषदेने याबाबत धोरणाचे परिपत्रक काढण्याचा निर्णय घेतला आहे. त्यात होर्डिंगची नियमावली, ग्रामपंचायतीच्या जबाबदारी यांसारख्या विविध गोष्टींची रूपरेषा परिपत्रकात असणार आहे.