याबाबत अधिक माहिती अशी की, चाकण औद्योगिक वसाहतीतून संबंधित कंटेनर नाशिक मालेगावकडे निघाला होता. खेड घाट पास करून पुढे आल्यावर भोरवाडी हद्दीत असलेल्या पुलाजवळ भरधाव वेगाने एक कार जात होती. मात्र रस्त्यावर स्पीड ब्रेकर असल्याचे पाहून कार चालकाने ब्रेक दाबला.
कारच्या मागून येणारा कंटेनर क्र. एम एच ४७ सी २३१८ हा वेगात येत होता. त्यामुळे कारला वाचविण्याच्या नादात कंटेनर चालकाने कंटेनर उजवीकडे ओढल्याने तो जागेवरच पलटी झाला. त्यामुळे नाशिककडून पुण्याकडे जाणारी वाहतूक पूर्णपणे बंद करण्यात आली होती.
समृद्धी महामार्गावर ट्रकला अपघात, बिअरचे बॉक्स घेण्यासाठी तरुणांपासून वृद्धांची गर्दीच गर्दी!
घटनेची माहिती मिळताच पोलिस प्रशासन घटनास्थळी दाखल झाले. ते कंटेनर रस्त्यातून बाजूला करण्यासाठी प्रयत्न करत होते. तर काही कर्मचारी वाहतूक सुरळीत करण्यासाठी लागले होते. एका बाजूने वाहतूक पूर्णपणे बंद करण्यात आल्याने मोठी वाहतूक कोंडी झाली होती.
वाहतूक विभागाचे पोलीस निरीक्षक अशोक पिंपळे, हवालदार तुकाराम मोरे, पोलीस कॉन्स्टेबल गवारी, कारभळ, हवालदार हेमंत मडके, जयवंत कोरडे, भीमा आहेर आणि पोलिसांनी वाहतूक नियंत्रणाचे काम पाहिले. कंटेनर दुपारी रस्त्यावरून बाजूला घेण्यात यश आले. त्यानंतर पुणे नाशिक रस्त्यावरील वाहतूक सुरळीत झाली.