सातारा :मामांना भेटून मोटारसायकलवरून पांढरवाडीहून फलटणकडे येत असताना जवान प्रशांत पांडुरंग नाळे (वय ३३, रा. दुधेबावी, ता. फलटण, जि. सातारा) यांचा बिजवडी येथे मराठी शाळेच्या अलिकडे पुलाला धडकून अपघात झाला. या अपघातात जखमी होऊन त्यांचा मृत्यू झाला. या घटनेची खबर बाबू मारुती नाळे यांनी दिली. प्रशांत हे सैन्य दलात (सीआरपीएफ) नाईक जम्मू येथे कार्यरत होते. ते पांढरवाडी ( खटाव ) येथे मामांना भेटायला गेले होते. ते आजच जम्मू येथे नियुक्तीच्या ठिकाणी जाण्यासाठी रवाना होणार होते. अक्षय तृतीयेच्या आदल्या दिवशी ही घटना घडल्याने दुधेबावी गावावर शोककळा पसरली.
याबाबत पोलिसांनी दिलेली माहिती अशी की, बाबू मारुती नाळे यांनी पोलीस ठाण्यात फिर्याद दिली असून त्यात म्हटले आहे की, चुलत भाऊ प्रशांत पाडुरंग नाळे हे त्यांच्या ताब्यातील बजाज पल्सर मोटारसायकल ( MH-11 CB 5805) घेऊन मामाला भेटून पांढरवाडीहून फलटणकडे येत असताना त्यांचा बिजवडी येथे मराठी शाळेच्या अलिकडे पुलाला जोरात धडक होऊन अपघात झाला. त्यात ते गंभीर जखमी झाले.
त्यांना उपचारासाठी फलटण येथील उपजिल्हा रुग्णालयात दाखल करण्यात आले, मात्र उपचारापूर्वी त्यांचा मृत्यू झाल्याचे डॉक्टरांनी सांगितले. शवविच्छेदनानंतर मृतदेह नातेवाईकांच्या ताब्यात देण्यात आला. याबाबतची कागदपत्र फलटण शहर पोलीस ठाण्यातून दहिवडी पोलीस ठाण्यात आज टपालाने मिळाल्यानंतर या घटनेची नोंद शनिवारी दुपारी दीड वाजता दहिवडी पोलीस ठाण्यात झाली आहे. या अपघाताचा तपास पोलीस नाईक आर. पी. खाडे करीत आहेत.
दुर्दैवी! सुट्टी जीवावर बेतली, मेडिकल कॉलेजचे १० विद्यार्थी धरणात पोहायला गेले, एकाचा बुडून मृत्यू
प्रशांत नाळे हे पांढरवाडी ( खटाव ) येथे मामांना भेटायला गेले होते. तेथून परतत असताना बिजवडी येथे अपघातात त्यांचा मृत्यू झाला. ते आज, शनिवारी जम्मू येथे नियुक्तीच्या ठिकाणी जाण्यासाठी रवाना होणार होते. मात्र, अक्षय तृतीयेच्या आदल्या दिवशी ही घटना घडल्याने दुधेबावी व परिसरात शोककळा पसरली. फलटण येथे शवविच्छेदनानंतर त्यांच्या पार्थिव फुलांनी सजविलेल्या ट्रॉलीतून अंत्यसंस्कारासाठी नेण्यात आले.
धक्कादायक! महिलेला तिचा जिम वर्कआउटचा फोटो व्हॉट्सअप केला, खाली लिहिला अश्लील मेसेज, विनयभंगाचा गुन्हा दाखल
यावेळी प्रशांत नाळे अमर रहेच्या घोषणाही देण्यात आल्या. त्यांच्या मृत्यूची बातमी परिवारास समजताच त्यांची आई, वडील, भाऊ, पत्नी व त्यांचा दोन वर्षाचा मुलगा यांचा आक्रोश पाहून अनेकांची मने हेलावली. अनेकांना अश्रू अनावर झाले होते.