सातारा :सताऱ्यातील शाहूपुरी परिसरात धक्कादायक घटना घडली आहे. आपले वडील त्यांना आलेली पेन्शन इतरांना देत नाहीत या कारणावरून चिडलेल्या मुलाने वडिलांना बेदम मारहाण केली. तु्म्हाला आलेली पेन्शन तुम्ही एकटेच कसे खाता, मला का देत नाही, असे म्हणत या निर्दयी मुलाने वडिलांना बेल्ट आणि काठीने मारहाण केली. शाहूपुरीतील गुलमोहर कॉलनीत मंगळवारी १८ तारखेला संध्याकाळी पाच वाजण्याच्या सुमारास ही घटना घडली.या प्रकरणाबाबत अधिक माहिती देताना पोलिसांनी सांगितले की, आशीष दादासाहेब गोडसे ( वय ३९ वर्षे) आणि रेखा दादासाहेब गोडसे अशी गुन्हा दाखल झालेल्या मायलेकाची नावे आहेत. पोलिसांच्या माहितीनुसार, दादासाहेब वामन गोडसे ( वय ६७ वर्षे) असे निवृत्त पेन्शनधारी व्यक्तीचे नाव आहे. दादासाहेब गोडसे हे पोलीस दलातून डीवायएसपी पदावरून निवृत्त झाले. अजूनही ते गुन्हेगारांचे न्यायालयात दोषारोप पत्र दाखल करताना कोणतीही त्रुटी राहू नये, या संदर्भात पोलीस प्रशासनाला मार्गदर्शन करण्याचे काम करत असतात. या कामासाठी ते पुणे, मुंबई असे फिरत असतात.

नेमके काय घडले?

दादासाहेब गोडसे हे मंगळवारी, १८ तारखेला आपल्या साताऱ्यातील राहत्या घरी वर्तमानपत्र वाचत बसले होते. त्यावेळी त्यांचा मुलगा आशीष त्यांच्या जवळ आला आला म्हणाला की तुम्ही पेन्शन एकटेच खाता, मला देत नाही. असे म्हणत त्याने त्यांना बेल्टने मारहाण करण्यास सुरू केले. आशीष इतक्यावरच न थांबता त्याने वडिलांना काठीने मारहाण करण्यास सुरुवात केली. त्याने त्यांच्या हातांवर आणि पायांवर काठीने प्रहार केले. ही मारहाण होत असताना गोडसे यांची पत्नी रेखा गोडसे हीने त्यांचे हात धरले आणि मुलाला मारहाण करण्यात मदत केली. या मारहाणीत गोडसे जखमी झाले. त्यांच्या अंगावर मारहाणीचे वळ उठले.

मारहाणीनंतर गोडसे स्वत: शासकीय रुग्णालयात उपचारासाठी गेले. तेथे दाखल होत त्यांनी उपचार घेतले. त्यानंतर बुधवारी रात्री त्यांनी शाहूपुरी पोलीस ठाण्यात मुलगा आशीष व पत्नी रेखा यांच्या विरोधात तक्रार दाखल केली.

आशीष हा दादासाहेब गोडसे यांचा एकुलता एक मुलगा आहे. तो व्यावसायाने इंजिनीअर आहे.