सोलापूर :अक्कलकोट तालुक्यातील मैंदर्गी परिसरात एका युवकाचा खून करून अर्धवट जाळलेल्या मृतदेहाच्या प्रकरणाचा चोवीस तासांत छडा लावण्यात अक्कलकोट पोलिसांना यश आले आहे. प्रेमाच्या आड येणाऱ्या प्रेयसीच्या पतीचा प्रियकराने काटा काढल्याचा धक्कादायक प्रकार उघडकीस आला आहे. या प्रकरणी अक्कलकोट दक्षिण पोलिसांनी एकास अटक केली आहे.चंदप्पा धर्मण्णा कांबळे (वय ३४, रा. आंबेवाड, ता. आळंद, जि. कलबुरगी) असे त्या मयत युवकाचे नाव आहे. तर सूर्यकांत शरणप्पा कांबळे (रा. देवंती, ता आळंद, जि. कलबुरगी ) असे अटक केलेल्या संशयित आरोपीचे नाव आहे. त्यास अक्कलकोट न्यायालयासमोर हजर केले असता त्यास सुरुवातीला पाच दिवसाची पोलीस कोठडी सुनावण्यात आली होती. सोमवारी पुन्हा तीन दिवसांची पोलीस कोठडी देण्यात आली आहे. अक्कलकोट दक्षिण पोलीस ठाण्यात अज्ञात इसमा विरोधात बुधवारी दुपारी गुन्हा दाखल झाला होता. तपास पथकाची नेमणूक करून तपासाची चक्रे जलदगतीने फिरविली. संशयित आरोपीस बेड्या ठोकल्या आहेत.

अनेक वर्षांपासून प्रेमसंबंध होते

मयत चंदप्पा कांबळे आणिसीताबाई यांचे २००८ साली लग्न झाले होते. दोघेही मूळचे कर्नाटक राज्यातील आंबेवाड (ता आळंद, जि गुलबर्गा) येथील होते. ट्रक चालक संशयित आरोपी सूर्यकांत कांबळे याचे सीताबाई सोबत २००७ पासून प्रेमसंबंध होते. लग्नानंतर देखील प्रेमप्रकरण सुरूच होते. संसाराचा गाडा चालवण्यासाठी चंदप्पा व सीताबाई हे पुणे जिल्ह्यातील यवत या ठिकाणी कामानिमित्त गेले होते. संशयित आरोपीने गावाकडचा पाहुणा आहे असे सांगत चंदप्पा कांबळे सोबत मैत्री केली होती. संशयित आरोपी सूर्यकांत कांबळे प्रेयसीचा पती नसताना घरी जात होता.

प्रेयसीचा पती संशय घेत प्रेमसंबंधात अडसर ठरत होता

ट्रकचालक सूर्यकांत कांबळे हा घरात कोणी नसताना येत होता याची कुणकुण चंदप्पा यास लागली होती. तो पत्नीला याबाबत जाब विचारत होता. आपल्या प्रेमसंबंधात अडसर ठरत असल्याने सूर्यकांत हा दातओठ खात होता. अखेर त्याने डाव साधला आणि प्रेयसीचा पती चंदप्पा याच्यासोबत गावाकडे जाण्याचा प्लॅन केला. सूर्यकांतने बल्कर वाहनातून मंगळवारी चंदप्पा कांबळे यास गावाकडे जाऊ असे सांगत घेऊन निघाला.

पुणे जिल्ह्यातील यवत येथून इंदापूर, सोलापूर, अक्कलकोट मार्गे घेऊन आला. वाटेत इंदापूर येथे त्याला फुल्ल दारू पाजली. चंदप्पा कांबळे हा गाढ झोपेत असताना, संशयित आरोपी सूर्यकांत कांबळेने मोठा व्हील पाना घेऊन गळ्यावर आणि कंठावर जोरदार प्रहार केला. कंठ आतल्या आत तुटून रक्तस्त्राव होत चंदप्पाचा जागीच मृत्यू झाला. अक्कलकोट तालुक्यातील मैंदर्गी येथील एका खड्ड्यात मृतदेह टाकला आणि डिझेल ओतून पेटवून दिले. पण मृतदेह अर्धवट जळाले, अर्धवट जळालेल्या मृतदेहावरून तपास लागला.

मी नसताना घरी येतो आणि माझ्याच बायकोसोबत… नवऱ्याच्या मनात संशय, अखेर नको तेच घडलं

पोलिसांनी खुनाचा छडा लावत संशयित आरोपीच्या मुसक्या आवळल्या

खून करून पुरावा नष्ट करण्याच्या उद्देशाने चंदप्पाचे प्रेत जाळले, असा संशय पोलिसांना आला. मृतदेहाच्या बाजूला अर्धवट जळालेले आधार कार्ड देखील आढळले, त्यावरून मृतदेहाची ओळख पटली. पोलिसांनी ताबडतोब यवत गाठून पत्नी सीताबाईची चौकशी केली. चंदप्पा व सूर्यकांत हे दोघे गावाकडे जाण्यासाठी बलकर (सिमेंट ट्रक) मधून निघाले होते अशी माहिती समोर आली. अक्कलकोट पोलिसांनी सायबर पोलिसांच्या मदतीने सूर्यकांत कांबळे याचा शोध लावला, तर गुलबर्गा (कर्नाटक) जिल्ह्यातील सेडम या ठिकाणी सिमेंट कंपनीत असल्याची माहिती पोलिसांना मिळाली. सूर्यकांतला ताबडतोब सेडम येथून ताब्यात घेऊन चौकशी केली असता त्याने खुनाची कबुली दिली.

ती पाच लेकरांची आई, तर हा चार लेकरांचा बाप, तरीही प्रेमसंबंध सुरूच

सीताबाई व सूर्यकांत या दोघांचे प्रेमसंबंध लग्नाअगोदर सुरू झाले होते. दोघांचेही लग्न होऊन अनेक वर्षे झाली होती. या मोठ्या काळात सीताबाईला पाच लेकरं झाली व सूर्यकांतला चार लेकरं झाली तरीही दोघांचे प्रेमसंबंध सुरूच होते. या प्रेमसंबंधामध्ये चंदप्पा अडसर ठरत होता म्हणून त्याचा खून झाला. या खुनात प्रेयसी म्हणजे मयत चंदप्पाच्या पत्नीचा सहभाग होता की नाही याचा तपास पोलीस करत आहेत.

मजबूत पुरावा पोलिसांच्या हाती लागला तर प्रेयसीला देखील आरोपी करण्याची शक्यता आहे. या खुनाचा छडा लावण्यात अक्कलकोट उपविभागीय पोलीस अधिकारी राजेंद्रसिंह गौर, पोलीस निरीक्षक महेश स्वामी, पोलीस उपनिरीक्षक सिद्राम धायगुडे, पोलीस हवालदार अजय भोसले, सुरेश जाधव, पोलीस नाईक नबीलाल नियोंवाले, जगदीश राठोड, सुभाष दासरे, हरिदास सलगर, सिकंदर मुल्ला, विजय कोरे, श्रीकांत जवळगे यांनी महत्वाची भूमिका बजावली आहे.

नवी मुंबईत पत्नीचा खून, पापक्षालनासाठी सोलापुरातील बाळूमामाच्या मंदिरात, प्रसाद खाताना अटक