प्रवासी म्हणतात…

रविवार वेळापत्रकाचा विशेषत: महिला प्रवाशांना रोजच्या तुलनेत अधिक त्रास होतो. ‘रविवार वेळापत्रकाच्या दिवशी तिकीट तपासनीसांची संख्या कमी असल्याने प्रथम श्रेणीच्या महिला डब्यात घुसखोरी होते. त्याचा त्रास हजारो रुपये मोजून प्रथम श्रेणीचा पास काढणाऱ्यांना होतो. यामुळे महिला विशेष गाड्यांची संख्या वाढवण्यात यावी व रविवार व्यतिरिक्तच्या सुट्टीच्या दिवशी हे वेळापत्रक लागू करू नये’, अशी मागणी महिला प्रवासी नलिनी देशमुख यांनी केली.

‘राष्ट्रीय सुट्टीच्या दिवशीही आम्हाला कार्यालयात जावेच लागते. मात्र रविवार वेळापत्रकामुळे लोकलला मोठी गर्दी असते. याच दिवसांत नियमित प्रवासाची सवय नसलेल्या प्रवाशांची संख्या मोठी असते. लोकल फेऱ्या अपुऱ्या असल्याने सर्वच डब्यांमध्ये प्रचंड गर्दी असते. मध्य आणि पश्चिम रेल्वेने सर्वसामान्यांच्या या त्रासाची दखल घेणे गरजेचे आहे’, अशी प्रतिक्रिया प्रवासी नरेश माने यांनी दिली.