वास्तविक विधवा शब्द जर त्यातील अपमानकारक सामाजिक वास्तव बदलले तर खटकणार नाही. तो वैवाहिक स्थिती सांगणारा शब्द आहे. जसे घटस्फोटित, परित्यक्ता शब्द आहे तसा हा शब्द आहे. पण त्या महिलांना इतके अपमानाचे जिणे जगावे लागले की त्या शब्दाची भीती वाटायला लागली. ते वास्तव बदलण्यापेक्षा मग शब्द बदलून समस्या सोपी केली जाते. गंगा भागीरथी हे तर अधिक हास्यास्पद आहे. म्हणजे पतीचे निधन झाले की महिला नदीइतकी पवित्र होते? मग पती असताना मग ती कोणती नदी असते? स्त्रियांचे असे सतत वेगवेगळे दैवतीकरण करायचे आणि दुसरीकडे मात्र वास्तव तसेच ठेवायचे, असा हा आपला सामाजिक सरकारी व्यवहार आहे.