पंकज याच्या आत्महत्येबाबत त्याचे वडील रामराज यांनी काही स्थानिक तरुणांवर आरोप केले आहेत. ‘रेशन दुकानावर काम करूनही काही महिन्यांचे पगार न मिळाल्याने त्याने पानटपरीवर काम करण्यास सुरुवात केली होती. आत्महत्येच्या दिवशी कामगार नगरातील काही स्थानिक तरुणांसोबत त्याचा पैशावरून वाद झाला. या तरुणांनी सलूनमध्ये नेऊन त्याचे मुंडण केले. शिवाय कामगार नगरमध्ये आणून पंकजला नग्न करून फिरवले. बदनामी झाल्याने तणावाखाली गेलेल्या पंकजने घरी जाऊन गळफास घेतला’, असा गंभीर आरोप रामराज यांनी केला असून, दोषींविरुद्ध कडक कारवाई करण्याची मागणी त्यांनी केली आहे. दरम्यान, या प्रकरणात पोलिसांनी अपमृत्यूची नोंद करून तपास सुरू केला असून, आरोपात तथ्य आढळल्यास पुढील कारवाई करण्यात येईल, असे म्हटले आहे.

‘आमचा तपास सुरू आहे. सध्या अपमृत्यूची नोंद करण्यात आली असून, तपासामध्ये काही आढळल्यास त्याप्रमाणे पुढील कारवाई केली जाईल. कुणीही दोषी आढळल्यास त्यांना पाठीशी घालणार नाही. जे पुरावे सापडतील त्यानुसार कारवाई होईल, वरिष्ठ पोलिस निरीक्षक सुनील चंद्रमोरे यांनी म्हटलं आहे.