पुणे : आपल्या पोटचं मूल गेल्यानंतर आई-वडिलांना काय यातना होत असतील, याची कल्पनाही कोणी करु शकणार नाही. अनेक जण लेकरांच्या आठवणीत अख्खं आयुष्य घालवतात, तर काही जण त्यांच्या आठवणी जपण्यासाठी वेगवेगळे मार्ग अवलंबतात. पुण्यातील राठी कुटुंबही असंच वेगळं ठरलं. आपल्या मुलीच्या अपघाती निधनानंतर कुटुंब मोठ्या तणावात होते. मात्र मुलगी प्रियम हिची आठवण जपण्यासाठी तिच्या पहिल्या स्मृती दिनी त्यांनी पुण्यातल्या जनता वसाहतीमधील मुलींना आंबे खाऊ घातले. कारण प्रियमला आंबे खूप आवडायचे.प्रियम राठी हिचे ९ एप्रिल २०२२ रोजी वयाच्या १९ व्या वर्षी पुण्यातील गहुंजे स्टेडियमजवळ अपघाती निधन झाले. राठी कुटुंबातील ही छोटी मुलगी होती. तिच्या निधनाच्या दुःखात न राहता तिची कुठली आवड जपता येईल, हा विचार कुटुंबीय करत होते. प्रियमला आंबे खाण्याची असलेली आवड जपण्यासाठी वडील सत्येंद्र राठी यांनी तिच्या पहिल्या स्मृतीदिनाचं निमित्त साधलं. पर्वती येथील जनता वसाहतीमधील मुलींना आंबे खायला देण्याचा उपक्रम त्यांनी राबवला. आंबे खाताना त्या प्रत्येक मुलीत आपली प्रियम असल्याचा भास राठी कुटुंबाला झाला.

यंदाच्या आंब्याच्या मोसमात जनता वसाहतीतील मुलींनी पहिल्यांदाच कोकणच्या राजाची चव चाखली, तेव्हा त्यांच्या आनंदाला पारावार उरला नाही. रसरशीत आंब्यांचा आस्वाद घेताना जिभेला सुटलेले पाणी, रसामुळे माखलेले हात, रंगलेले चेहरे आणि हास्यकल्लोळात दंग झालेल्या मुली, असे लोभनीय दृश्य प्रियम राठी हिच्या प्रथम स्मृती दिनी उपस्थितांनी अनुभवले.

मुंबईहून ठाणे गाठा समुद्राखालून, देशातील पहिला Under Sea बोगदा, कधी होणार शुभारंभ?
‘मनसोक्त आंबे खाऊया’ या कार्यक्रमाचे आयोजन प्रियमच्या मित्रमैत्रिणी व निरामय संस्थेच्या वतीने जनता वसाहत येथील जनता सांस्कृतिक हॉल येथे करण्यात आले होते. यावेळी सुमारे ६० ते ७० मुलींनी आंब्यांचा आस्वाद घेतला. तर कै. प्रियम राठीच्या मित्रमैत्रिणींनी प्रियमच्या आठवणींना उजाळा दिला.

दोन भावंडांनी घरासमोर उभारलं मायचं मंदिर; फायबरपासून बनवला आईचा हुबेहूब पुतळा

प्रियम विषयी भावना व्यक्त करताना तिचे वडील आणि सामाजिक कार्यकर्ते सत्येंद्र राठी म्हणाले ” प्रियम मास मीडिया कम्युनिकेशनची विद्यार्थिनी होती, तसेच ती सामाजिक व सांस्कृतिक कार्यक्रमामध्ये सदैव अग्रेसर असे. स्नूकर खेळणे, पर्यटन, साहसी क्रीडा प्रकारात सहभाग, ट्रेकिंग, फोटोग्राफी, मेंडोलीन वाजविणे, ढोल पथक, मॉडलिंग, इत्यादी अनेक उपक्रमात प्रियम, उत्स्फूर्तपणे सहभाग असे. प्रियमला आंबे खाणे आवडायचे. यातूनच तिने भटकंतीची हौस पुरविण्यासाठी ‘प्रियम आम’ या ब्रॅण्ड खाली आंबे विक्रीचा व्यवसाय सुरू केला होता. मुलींच्या रुपाने जणू प्रियमनेच मनसोक्त आंबे खाण्याचा आनंद लुटल्याचे समाधान लाभले.”

आईची आठवण जपण्यासाठी लेकरांनी घरासमोरच उभारलं स्मारक, पुण्यातील गोळे कुटुंबीयांचा आदर्श