कोकण विभागाव्यतिरिक्त सांगली, सोलापूर, जळगाव, नाशिक, नांदेड, परभणी, अकोला, अमरावती, ब्रह्मपुरी, चंद्रपूर, गोंदिया, नागपूर, वर्धा, वाशिम, यवतमाळ येथे पारा ३६ अंशांपलीकडे पोहोचला आहे. यातील अनेक केंद्रांवरील तापमान हे सरासरीपेक्षा कमी असले तरी पावसाळी वातावरणानंतर अनेक ठिकाणी २४ तासांमध्ये कमाल तापमानाने उसळी घेतली आहे. परभणी, उद्गीर येथे कमाल तापमानात २४ तासांमध्ये ५ अंशांहून अधिक तापमान वाढ झाली. विदर्भातही ४ अंश ते ९ अंश असा २४ तासांमध्ये कमाल तापमानात फरक पडला आहे. वर्धा येथे २४ तासांत कमाल तापमानाचा पारा तब्बल ९.३ अंशांनी वाढला. अकोला येथे ६.३, अमरावती येथे ६.४, ब्रह्मपुरी येथे ७.८, गोंदिया येथे ७.६, नागपूर येथे ७.२, यवतमाळ येथे ७ अंशांनी तापमान वाढल्याची नोंद झाली. मध्य महाराष्ट्रात २ ते २.५ अंशांदरम्यान २४ तासांमध्ये तापमान वाढले आहे.

रविवारी दिवसभरात पुणे, सातारा, अहमदनगर, नाशिक, सोलापूर, संभाजी नगर, परभणी आणि संलग्न विभागात संध्याकाळनंतर पावसाची उपस्थिती जाणवली. काही ठिकाणी दिवसाही हलका ते मध्यम स्वरुपाचा पाऊस पडला.