मुंबई: उपमुख्यमंत्री एकनाथ शिंदे यांच्या नेतृत्वाखालील शिवसेनेच्या शहरप्रमुखाने गृहराज्यमंत्री योगेश कदम यांच्या नावाचा वापर करून एसटी महामंडळाने खाजगी तत्वावर नेमलेल्या एजन्सीच्या कर्मचाऱ्याला धमकी दिल्याने मोठी खळबळ उडाली आहे. दापोली एसटी आगारात ‘ई’ बसेसचे व्यवस्थापन करणाऱ्या मोरया ट्रॅव्हल्स एजन्सीच्या कर्मचाऱ्याला ही धमकी देण्यात आल्याची कथित ऑडिओ क्लिप व्हायरल झाल्याने मोठी खळबळ उडाली आहे.

कर्मचाऱ्याला धमकी दिल्याची ही कथित ऑडिओ क्लिप दापोलीचे शिवसेनेचे शहरप्रमुख प्रसाद उर्फ पप्पू रेळेकर यांची असल्याचे समजते. या ऑडिओ क्लिपमध्ये सदर कर्मचाऱ्याला थेट जीवे मारण्याची धमकी दिल्याचं स्पष्ट होत आहे.

नेमकं काय आहे ऑडिओ क्लिपमध्ये?

व्हायरल ऑडिओ क्लिपमध्ये टॅव्हल्स एजन्सीच्या कर्मचाऱ्याला धमकी देताना पप्पू रेळेकर यांनी म्हटलं आहे की, “जेवढ्या ड्युटीला अलोकेशनला कॅन्सल केल्यास तेवढ्या जर केल्या नाहीस तर मी रात्रीपासून गाड्या फोडून टाकीन. माझ्यासारखा वाईट कोणी नाही. कोण योगेश गौरत त्याला सांग माझा फोन आहे. माझा आदेश म्हणजे योगेश कदमचा आदेश लक्षात ठेव. हे उपरे सुपरे आलेत ना त्यांचा आदेश मला नाही चालत. त्यांची एक जरी ड्युटी कॅन्सल केलीस तर मी गाड्या फोडून टाकीन आणि तिथं आलो ना तर स्टाफसोबत तुला जाळून टाकीन,” अशा स्वरूपाची भाषा या ऑडिओ क्लिपमध्ये वापरण्यात आली आहे.

रेळकर यांचं स्पष्टीकरण काय?

एका कर्मचाऱ्याला धमकी देतानाची ऑडिओ क्लिप व्हायरल झाल्यानंतर ‘महाराष्ट्र टाइम्स ऑनलाइन’ने पप्पू रेळेकर यांची बाजू जाणून घेण्याचा प्रयत्न केला. याबाबत रेळेकर यांनी म्हटलं की, “आम्ही आमची बाजू रविवारी संध्याकाळी किंवा सोमवारी सकाळी पत्रकार परिषद घेऊन मांडणार आहोत.”

दरम्यान, ही व्हायरल ऑडिओ क्लिप रविवारी सकाळपासून रत्नागिरी जिल्ह्यात चर्चेचा विषय ठरली आहे. आता या सगळ्याबाबत ज्यांचं नाव घेऊन शहरप्रमुखाने धमकी दिले ते शिवसेनेचे युवा नेते आणि गृहराज्यमंत्री योगेश कदम हे काय भूमिका घेतात, हे पाहणं महत्त्वाचं ठरणार आहे.