मुंबई: राज्याच्या राजकारणात लवकरच नवी समीकरणे पाहायला मिळण्याची शक्यता असून राष्ट्रवादी शरदचंद्र पवार पक्ष सत्ताधारी महायुतीसोबत जाणार असल्याची चर्चा रंगत आहे. एकीकडे शरद पवार ांच्या राष्ट्रवादीचे आमदार जयंत पाटील आणि भाजप नेते विनोद तावडे यांच्या कथित गुप्त भेटीबद्दल बोललं जात असतानाच स्वत: शरद पवार यांच्या कृतीनेही संभ्रम निर्माण झाला आहे. शरद पवार हे काल अनेक वर्षांनंतर अधिवेशनादरम्यान विधिमंडळात उपस्थित राहिले. यावेळी पवार यांनी शिवसेनेचे मुख्य नेते आणि राज्याचे उपमुख्यमंत्री एकनाथ शिंदे यांच्या दालनात आपल्या पक्षाच्या आमदारांची बैठक घेतल्याने सर्वांच्याच भुवया उंचावल्या. यावेळी शिंदे यांनीही पुष्पगुच्छ देत शरद पवारांचं स्वागत केलं. या स्वागताचा फोटो समोर आल्यानंतर शिवसेना उद्धव बाळासाहेब ठाकरे पक्षाने आक्रमक भूमिका घेतली आहे. “ज्यांनी आपलं सरकार पाडलं, त्या गद्दारांनी तुम्ही प्रतिष्ठा का देताय? यातून तुमच्या पक्षाची विश्वासार्हता कमी होते,” असा हल्लाबोल राऊत यांनी केला.
शरद पवारांच्या भूमिकेवर टीका करताना संजय राऊत यांनी म्हटलं आहे की, “शरद पवार मोठे नेते आहेत. मात्र ज्या एकनाथ शिंदे यांनी राज्याला भ्रष्टाचाराची कीड, गद्दारीची वाळवी लावली, त्या शिंदे यांच्या दालनात शरद पवारांनी बैठक घेणं बरोबर नाही. बैठक घेण्यासाठी अख्खं विधानभवन ओस पडलेलं का? विधानभवनासमोर राष्ट्रवादी भवन आहे, शिवसेना भवन आहे, ते कमी पडलं म्हणून विधिमंडळात भेटीगाठी, बैठका घेतल्या जातात. यामुळे राष्ट्रवादी शरदचंद्र पवार पक्षाची विश्वासार्हता कमी होते,” अशी टीका पत्रकार परिषदेतून संजय राऊत यांनी केली.
रोहित पवारांच्या नाराजी चर्चा
राष्ट्रवादी शरदचंद्र पवार पक्ष एनडीएसोबत जाणार असल्याच्या चर्चा सुरू झाल्यानंतर पक्षाचे आमदार आणि शरद पवार यांचे नातू रोहित पवार हे नाराज असल्याची माहिती आहे. मागील आठवड्यात विधिमंडळात पवारांच्या राष्ट्रवादीच्या आमदारांची बैठक पार पडली. या बैठकीत आमदारांकडून पक्षाच्या नेत्यांना आगामी दिशेबाबत स्पष्टता देण्याची विनंती करण्यात आली. तेव्हा आपण सत्तसोबत जाण्याचा विचारात असल्याचं ज्येष्ठ नेत्यांकडून आमदारांना सांगण्यात आल्याचे समजते. मात्र ही भूमिका न पटल्याने रोहित पवार हे बैठक अर्धवट सोडून निघून गेल्याचं सांगितलं जात आहे. तसंच काल विधिमंडळात शरद पवार यांच्या नेतृत्वात झालेल्या बैठकीला रोहित पवार अनुपस्थित होते. त्यामुळे ते काय निर्णय घेतात, याबाबत उत्सुकता आहे.
काँग्रेसमध्ये जाणार?
राष्ट्रवादी शरदचंद्र पवार पक्ष सत्तेत सहभागी झाल्यास भाजपला विरोध करण्यासाठी रोहित पवार हे काँग्रेस पक्षात सहभागी होऊ शकतात. पक्षाने एनडीएत सहभागी होण्याचा निर्णय घेतल्यास तुम्ही काय भूमिका घेणार, असा प्रश्न काही दिवसांपूर्वी रोहित पवारांना विचारण्यात आला होता. त्यावर उत्तर देताना त्यांनी अप्रत्यक्षपणे वेगळी भूमिका घेण्याचे संकेत दिले होते.
दरम्यान, एकीकडे भाजप आणि एकनाथ शिंदेंसोबतच्या सलगीच्या चर्चांनी मित्रपक्ष असलेल्या शिवसेना उद्धव बाळासाहेब ठाकरे पक्षाची टीका आणि नातू असलेल्या रोहित पवारांचीही नाराजी, या पार्श्वभूमीवर शरद पवार आगामी काळात नेमका कोणता राजकीय निर्णय घेतात, सत्तेसोबत जाणं पसंत करतात की विरोधात लढण्याची तयारी दाखवतात, हे पाहणं महत्त्वाचं ठरणार आहे.