पुणे, दि. ८: प्रादेशिक हवामान विभागाने पुणे जिल्ह्यासाठी ऑरेंज अलर्ट जारी केल्यानंतर जिल्ह्यात अनेक ठिकाणी मुसळधार पाऊस झाला असून जिल्हा प्रशासनाने सर्व यंत्रणा सतर्क ठेवत बचाव, मदत व स्थलांतराची कार्यवाही उपमुख्यमंत्री तथा पालकमंत्री सुनेत्रा अजित पवार यांच्या निर्देशानुसार व जिल्हाधिकारी जितेंद्र डुडी यांच्या मार्गदर्शनाखाली युद्धपातळीवर सुरू ठेवली आहे.

जिल्ह्यातील १५८ महसूल मंडळांपैकी ६४ मंडळांमध्ये ६५ मि.मी.पेक्षा अधिक पावसाची नोंद झाली आहे. जिल्ह्याचा सरासरी पाऊस ६९.४ मि.मी. इतका नोंदविण्यात आला आहे. मुळशी तालुक्यातील आंबवणे येथे २९६ मि.मी., आंबेगाव तालुक्यात ३१७ मि.मी., लोणावळा येथे २०२ मि.मी., कुसगाव येथे १८९ मि.मी., वडगाव मावळ, चाकण, करंजविहिरे, पाईट, पोमगाव, माले आदी भागांतही अतिवृष्टीची नोंद झाली आहे.

आज दुपारी सुमारे २ वाजता मोशी येथील कचरा डेपो शेजारील तीन मजली इमारत कोसळण्याची दुर्घटना घडली. या दुर्घटनेत १५ ते १९ नागरिक अडकल्याची माहिती असून दक्षिण कमानची विशेष तुकडी, एनडीआरएफ, अग्निशमन दल, स्थानिक प्रशासन व आपदा मित्र यांच्या संयुक्त प्रयत्नातून आतापर्यंत चार जणांची सुखरूप सुटका करण्यात आली आहे. उर्वरित नागरिकांना बाहेर काढण्यासाठी बचावकार्य सुरू आहे.

अतिवृष्टीमुळे पुणे शहर, हवेली, मुळशी, भोर, मावळ, वेल्हा, जुन्नर, खेड, आंबेगाव तसेच पिंपरी-चिंचवड परिसरातील अनेक पूल व रस्ते सुरक्षिततेच्या कारणास्तव वाहतुकीसाठी तात्पुरते बंद करण्यात आले आहेत. अनेक ठिकाणी दरड कोसळणे, पूल पाण्याखाली जाणे, रस्ते खचणे व रस्त्यावर माती-दगड आल्यामुळे वाहतूक वळविण्यात आली असून संबंधित विभागांकडून रस्ते पूर्ववत करण्याचे काम सुरू आहे.

पूर व पावसाचा धोका लक्षात घेऊन जिल्ह्यात विविध ठिकाणांहून नागरिकांचे सुरक्षित स्थळी स्थलांतर करण्यात आले आहे. पुणे शहरातील येरवडा, बोपोडी, खडकी व शिवाजीनगर परिसरासह हवेली, मुळशी, भोर, मावळ, वेल्हा, जुन्नर आणि आंबेगाव तालुक्यांतील पूरग्रस्त व धोकादायक भागांतील नागरिकांना शाळा, समाजमंदिरे, ग्रामपंचायत हॉल, संपर्क शाळा तसेच नातेवाईकांकडे सुरक्षित हलविण्यात आले आहे. स्थलांतरित नागरिकांसाठी निवारा, भोजन, पिण्याचे पाणी व इतर आवश्यक सुविधा उपलब्ध करून देण्यात आल्या आहेत.

जिल्हा प्रशासन, महसूल विभाग, पोलीस, अग्निशमन दल, एनडीआरएफ, आरोग्य विभाग, सार्वजनिक बांधकाम विभाग, पाटबंधारे विभाग, स्थानिक स्वराज्य संस्था आणि स्वयंसेवी संस्था यांच्यामार्फत समन्वयाने मदत व बचाव कार्य सुरू असून परिस्थितीवर सातत्याने लक्ष ठेवण्यात येत आहे.

पुणे जिल्ह्यात सुरू असलेल्या अतिवृष्टीच्या पार्श्वभूमीवर जिल्हा प्रशासनाने विविध तालुक्यांमध्ये प्रतिबंधात्मक उपाययोजना अधिक गतिमान केल्या आहेत. धोकादायक ठिकाणांवरील नागरिकांना सुरक्षितस्थळी हलविणे, निवारा, अन्न व आवश्यक सुविधा उपलब्ध करून देणे तसेच बचाव पथके सतर्क ठेवण्यात आली आहेत.

जिल्ह्यात आतापर्यंत एकूण 54 ठिकाणांहून 10,271 नागरिकांचे सुरक्षितस्थळी स्थलांतर करण्यात आले आहे. विशेषतः जुन्नर, आंबेगाव, मुळशी, भोर, वेल्हा, मावळ, हवेली तसेच पिंपरी-चिंचवड परिसरात प्रशासनाने तातडीने कारवाई केली आहे.

जुन्नर तालुक्यातील स्थलांतर

माळीण अंतर्गत पसारवाडी येथील 13 कुटुंबांतील 36 नागरिकांना शासकीय आश्रमशाळा, असाणे येथे स्थलांतरित करण्यात आले. तसेच काळवाडी क्र. 1 व काळवाडी क्र. 2 येथील सुमारे 45 कुटुंबांतील 225 नागरिकांना ग्रामपंचायत कार्यालय जांभोरी, अंगणवाडी, समाजमंदिर व रयत शिक्षण संस्थेच्या शाळेसह पाच सुरक्षित ठिकाणी हलविण्यात आले. स्थलांतरितांसाठी जांभोरी येथे सेंट्रल किचनमार्फत भोजनाची व्यवस्था करण्यात आली आहे. पांचाळे खुर्द येथील 12 कुटुंबांतील 35 नागरिकांना जिल्हा परिषद प्राथमिक शाळा, आडिवरे येथे, तर आमडे येथील 8 कुटुंबांतील 22 नागरिकांना माळीण येथील शैक्षणिक संस्थेमध्ये सुरक्षित हलविण्यात आले.

पिंपरी-चिंचवड महापालिका क्षेत्रात मोठ्या प्रमाणावर स्थलांतर 

इंद्रायणी नदीला आलेल्या पुरामुळे सांगवी, पिंपरी, रहाटणी, चिखली, पिंपळे गुरव, कासारवाडी, दापोडी, चिंचवड आदी भागांतील नागरिकांना विविध महापालिका शाळा, समाजमंदिरे व निवारा केंद्रांमध्ये स्थलांतरित करण्यात आले. या भागात हजारो नागरिकांना सुरक्षित ठिकाणी हलवून आवश्यक सुविधा उपलब्ध करून देण्यात आल्या आहेत.
लोणी काळभोर परिसरातील भावडी येथील 5 कुटुंबांतील सुमारे 25 ते 27 नागरिकांना नातेवाईकांकडे व गावातील सुरक्षित ठिकाणी स्थलांतरित करण्यात आले आहे.

मनुष्यहानी

अतिवृष्टीशी संबंधित घटनांमध्ये आतापर्यंत 3 जणांचा मृत्यू झाला असून 2 व्यक्तींचा शोध सुरू आहे. भोर तालुक्यातील पान्हवळ येथील एक ज्येष्ठ नागरिक ओढ्यात वाहून गेल्याची घटना घडली असून शोधकार्य सुरू आहे. मावळ व हवेली (लोणी काळभोर) परिसरातील घटनांमध्येही मृत्यूची नोंद झाली आहे.

पशुधनहानी

जिल्ह्यातील विविध भागांत पूर व मुसळधार पावसामुळे 5 मोठी जनावरे आणि सुमारे 4,550 कोंबड्यांचे नुकसान झाले आहे. यामध्ये जुन्नर, आंबेगाव, वेल्हा, मुळशी व पिंपरी-चिंचवड परिसरातील घटना समाविष्ट आहेत.

घरांचे नुकसान 

जुन्नर, आंबेगाव, मुळशी, वेल्हा, भोर, मावळ, पुणे शहर व पिंपरी-चिंचवड परिसरात कच्ची व पक्की घरे, पत्राशेड, गोठे तसेच घरांच्या भिंतींचे मोठ्या प्रमाणावर नुकसान झाले आहे. अनेक ठिकाणी वीज खांब कोसळणे, झाडे घरांवर पडणे, पत्रे उडून जाणे व भिंती कोसळण्याच्या घटना घडल्या असून संबंधित पंचनाम्याचे काम महसूल यंत्रणेकडून सुरू आहे.

जिल्हा प्रशासन, महसूल विभाग, पोलीस, अग्निशमन दल, एनडीआरएफ, एसडीआरएफ, स्थानिक स्वराज्य संस्था आणि स्वयंसेवी संस्थांच्या समन्वयातून बचाव व मदतकार्य युद्धपातळीवर सुरू असून नागरिकांनी अफवांवर विश्वास न ठेवता प्रशासनाच्या सूचनांचे पालन करावे, असे आवाहन करण्यात आले आहे.

००००