मुंबईकरांमध्ये भीतीची भावना

फेब्रुवारीमध्ये लोकलप्रवासात झालेली प्राध्यापकाची हत्या आणि परवा मयंक लोहारने गमावलेला जीव… प्रवासात वाढलेल्या या हिंसेने मुंबईकर भयभीत झाले आहेत. थुंकणारे पादचारी, कचरा टाकणारी मंडळी, रांगा मोडणारे महाभाग या साऱ्या बेशिस्तांना आता सहन करायचे आणि जीव वाचवायचा तर मूग गिळून गप्प बसायचे अशी भावना झाली आहे. मुंबईकरांसाठी हा बदल धक्कादायक आणि स्वभावाला मुरड घालण्यास भाग पाडणारा आहे.

प्रवासी महिलेची बोलकी व्यथा

‘परवाच माझा मुलगा आणि मी लोकलने प्रवास करत होतो. एक प्रवासी समोरच्या आसनावर बुटांसह पाय पसरून बसला होता. माझ्या मुलाने त्याला पाय खाली घेण्यास सांगितले, तर वाद सुरू झाला. माझ्या मुलाची बाजू योग्य होती, पण इतर प्रवाशांनी मध्यस्थी केली नाही. त्याच संध्याकाळी मयंक लोहारची लोकलमध्ये हत्या झाल्याची बातमी आली आणि पायाखालची जमीन सरकली. मयंकही माझ्याच मुलाच्या वयाचा होता…’

डोंबिवलीहून दादरला प्रवास करणाऱ्या एका महिलेची ही प्रतिक्रिया खूप बोलकी आहे. धावत्या लोकलमध्ये झालेल्या मयंकच्या हत्येनंतर आता घरोघरी कॉलेजला जाणाऱ्या मुला-मुलींना, नोकरीधंद्यासाठी बाहेर पडणाऱ्या सर्वच वयाच्या स्त्री-पुरुषांना एकच तंबी मिळत आहे, बोलावेसे वाटले, तरी राग आवरायचा. प्रवासात आता एकच ‘मौन’रागच आळवायचा. मुंबईच्या उपनगरीय रेल्वेतील प्रवासात हळदीकुंकू, गरबा, भोंडला, भजने, मेजवान्या साजरे करण्याच्या रम्य कथा सांगणारे पालक मयंक लोहार प्रकरणानंतर हादरले आहेत.
Ketan Agarwal : पूर्ण चौकशीविना लग्न लावू नका, केतनच्या आजोबांकडून भीती व्यक्त; सियाच्या विवाहाची घाई का करताय? गोयलांना दोन ऑप्शन दिलेले

महिला वर्गांचे लेकरांना शांततेचे धडे

डोंबिवलीहून मुलुंडला महाविद्यालयात जाणाऱ्या सारंगीचे आईवडील चिपळूणला राहतात. तिच्या आईने तिला फोन करून लोकलमध्येच नाही, तर एकंदरीत कोणाशीच काही भांडू नको, असा सल्ला दिला आहे. ‘माझी आई मला पुन्हा चिपळूणला बोलावून घेत आहे. पण शिक्षण पूर्ण केल्याशिवाय परत कसे जायचे’, असा प्रश्न सारंगी विचारते. मालाडहून दादरला येणाऱ्या निशांतची आई प्रार्थना पगारे या प्रकरणानंतर धास्तवल्या आहेत. ‘पश्चिम रेल्वेवर अशा प्रकारे हल्ल्यात प्रवाशाचा मृत्यू होण्याची ही दुसरी घटना आहे. मी परवापासून माझ्या मुलाला बाहेर पडताना माझी शपथ घालून सांगतेय की, प्रवास करून कोणाशीही वाद न घालता परत ये’, असे त्या म्हणाल्या.

वाद नको, भावंडांचेही सल्ले

नोकरी करणाऱ्यांनाही घरातून हीच तंबी मिळत आहे. कोलकात्यातून मुंबईत नोकरीनिमित्त आलेली देबप्रिया अंधेरी ते ग्रँट रोड प्रवास करते. ती तिच्या सख्ख्या बहिणीसोबत येथे राहते. तिच्या आईवडिलांनी दोन्ही मुलींना कामाशी काम ठेवण्याचा सल्ला दिला आहे. ‘माझी ताई बेस्टने प्रवास करते. आम्ही दोघी एकमेकांना दोन दिवस हेच बजावत आहोत की, कोणाशीही वाद घालायचा नाही. काही चुकीचे झाले, तरी स्वत: माफी मागायची’, असे आम्ही दोघींनीही ठरवून टाकल्याचे देबप्रिया सांगते.
Siya Goyal : सोनम जामिनावर सुटली म्हणून सियाची हिंमत वाढली, राजा रघुवंशीच्या आईची पहिली प्रतिक्रिया, पुण्याचा उल्लेख करत म्हणाली…
ठाणे, कल्याण, बोरिवली, अंधेरी अशा ठिकाणी राहणाऱ्यांना तर त्यांच्या घरून याच लोकल पकडून शांतपणे येण्याचा सल्ला दिला जात आहे. दरवाज्यात उभे न राहता आतल्या बाजूला उभे राहून किंवा शांतपणे बसून या, असे मला माझ्या बायकोने स्पष्ट शब्दात बजावल्याचे कौस्तुभ जोशी यांनी सांगितले.