नेमकी घटना काय?

मिळालेल्या माहितीनुसार, पूनम दिनेश मून (वय ३९, रा. गणेशनगर, येरवडा) यांचे अॅड. संजय सावंत याच्यासोबत प्रेमसंबंध असल्याचा संशय सावंत याची पत्नी स्वाती सावंत हिला होता. या संशयातूनच स्वाती सावंत, तिची मुलगी आणि स्वतः अॅड. संजय सावंत यांनी संगनमत करून पूनम मून यांची हत्या करण्याचा कट रचला. दिनांक १६ एप्रिल गुरुवारी रोजी दुपारी २ वाजल्यापासून ते काल शुक्रवारी सकाळी ११ वाजेपर्यंतच्या कालावधीत चंदननगरमधील जुना मुंढवा रोडवरील अॅड. सावंत यांच्या ऑफिसमध्ये ही घटना घडली. आरोपींनी आधी पूनम मून यांचे पाय दोरीने बांधले. त्यानंतर त्यांच्यावर निर्दयपणे हल्ला करत बॅटने तसेच धारदार शस्त्राने डोक्यावर आणि तोंडावर वार केले. या मारहाणीत त्या गंभीर जखमी झाल्या आणि त्यांचा जागीच मृत्यू झाला.
Nagpur Accident : जेवण करुन परतताना काळाची झडप, भीषण अपघातात दोघांचा जागीच अंत; रात्रभर पार्थिव रस्त्यावरच पडलेले
या प्रकरणात विशेष बाब म्हणजे, मृत महिलेच्या पतीने दिनेश मून यांनी आपल्या पत्नीची केलेली अखंड शोधाशोध आणि त्यातून समोर आलेलं भीषण वास्तव. दिनेश मून म्हणाले की, ‘त्या दिवशी नेहमीप्रमाणे दुपारी बायको घरातून ऑफिसला गेली होती. सगळं अगदी नॉर्मल होतं, ती रोजसारखीच निघाली होती. मला एकदा ती म्हणाली की दुसरीकडे काम बघू का? पण मी कामात असल्यामुळे जास्त लक्ष दिलं नाही. पण दुपारनंतर अचानक तिचा फोन बंद झाला आणि संपर्क तुटला’, असं दिनेश मून यांनी सांगितलं. सुरुवातीला त्यांना वाटलं की मोबाईल चार्ज नसावा किंवा कामात असेल. पण जसजसा वेळ पुढे गेला, तसतशी त्यांची चिंता वाढत गेली. मनात कुठेतरी एक अस्वस्थता निर्माण झाली होती, पण नेमकं काय झालंय याचा अंदाज लागत नव्हता. वकील सावंतचं त्याच्या बायकोसोबत अनैतिक संबंधाच्या संशयावरुन वाद होत होते. त्यामुळे दुसरीकडे मुलाखतीला गेली असेल म्हणून मोबाईल बंद असेल असंही त्यांना एकवेळी वाटल्याचं त्यांनी सांगितलं.

गोंधळात टाकणारी उत्तरं मिळाली

दुपारी ऑफिसमधूनच फोन आला आणि सांगण्यात आलं की ‘तुमची बायको आज ऑफिसला आलीच नाही’, हे ऐकून दिनेश मून यांच्या पायाखालची जमीन सरकली. कारण पत्नी तर घरातून निघालेली होती. त्यांनी पुन्हा पुन्हा फोन लावण्याचा प्रयत्न केला, पण मोबाईल सतत बंद येत होता. त्याक्षणी त्यांना पहिल्यांदा खूप मोठा संशय वाटायला लागला. ते कामावरून घरी परतल्यावर तातडीने ऑफिस परिसरात पोहोचले. तिथे जाऊन चौकशी केली, पण त्यांना वेगवेगळी आणि गोंधळात टाकणारी उत्तरं मिळाली. कुणी सांगत होतं की ती आल्या होत्या, तर कुणी म्हणत होतं की आम्ही पाहिलंच नाही. या विरोधाभासी माहितीमुळे त्यांचा संभ्रम वाढत गेला.
Pandharpur Crime : ‘तू वारंवार किरकिर करते’; संतापलेल्या नातीकडून आजीला बेदम मारहाण; विठ्ठलाच्या पंढरीत विठुरायाच्या भक्ताला संपवलं
दिनेश मून यांनी सीसीटीव्ही फुटेज पाहण्याचा निर्णय घेतला. त्या फुटेजमध्ये त्यांच्या पत्नी ऑफिसमध्ये प्रवेश करताना स्पष्ट दिसत होती, पण त्यानंतर त्या बाहेर आलेल्या कुठेच दिसत नव्हत्या. हा क्षण दिनेश मून यांच्या आयुष्यातला सर्वात मोठा धक्का ठरला. दरम्यान, त्यांनी पोलिसांशी संपर्क साधण्याचा प्रयत्न केला. मात्र सुरुवातीला तपासात थोडा विलंब झाला. पण त्यांना काहीतरी गंभीर घडलंय याची खात्री होती. त्यामुळे ते स्वतःच शोध घेत पुढे गेले. दुसऱ्या दिवशी सकाळी ते थेट ऑफिसपर्यंत पोहोचले. ते वारंवार आरोपी वकील संजय सावंतला विचारपूस करत होते परंतु त्यांच्याकडूनही उडवाउडवीची उत्तरे देण्यात येत होती.

कोपऱ्यात ठेवलेल्या गोण्या दिसल्या

दुसऱ्या दिवशी सकाळी ऑफिसला गेल्यावर ऑफिसचं दार उघडलं गेलं आणि ते आत गेले. आत पाऊल टाकताच वातावरण पूर्णपणे बदलल्यासारखं वाटलं. अंधारलेली खोली, चालू असलेला फॅन आणि अस्ताव्यस्त पडलेल्या वस्तू, हे सगळं पाहूनच काहीतरी चुकीचं घडलंय याची जाणीव झाली. ‘मी पुढे गेलो तर फरशीवर लालसर डाग दिसले. भिंतीवरही तसेच डाग होते’, असं त्यांनी सांगितलं. थोडं पुढे गेल्यावर कोपऱ्यात ठेवलेल्या गोण्या दिसल्या. काहीतरी भयंकर घडलंय याची खात्री त्यांना झाली. क्षणाचाही विलंब न करता त्यांनी पोलिसांना कॉल केला. चंदननगर पोलीस तत्काळ घटनास्थळी दाखल झाले. तपास सुरू करण्यात आला आणि गोण्या उघडताच आतून त्यांच्या पत्नीचं पार्थिव आढळून आलं.
Dharashiv Crime : युवकाला मध्यरात्री संपवलं, २०० मीटर फरपटत नेलं, कृष्णाथ यांच्या हत्येचं गूढ उलगडलं; बायकोनं कुणाच्या सहाय्याने काटा काढला?
पुढील तपासात समोर आलं की वकिल संजय सावंत, त्याची पत्नी स्वाती सावंत आणि अल्पवयीन मुलगी यांनी मिळून हा गुन्हा केल्याचा संशय आहे. पोलिसांनी अवघ्या काही तासांत तिघांना अटक केली आहे. प्राथमिक तपासानुसार, अनैतिक संबंधांच्या संशयातून हा प्रकार घडल्याचं समोर आलं. आज आरोपींना न्यायालयामध्ये नेण्यात आलं. पुढील अधिकचा तपास पोलीस करत आहेत.