Tragic Incident In Nagpur : नागपुरातून एक अत्यंत धक्कादायक घटना समोर आली आहे. पाणी समजून चुकून तारपीन प्यायल्यामुळे अवघ्या दोन वर्षांच्या चिमुकल्याचा मृत्यू झाला. वाठोडा परिसरातील या घटनेमुळे सर्वत्र हळहळ व्यक्त होत आहे.
मिळालेल्या माहितीनुसार, ही घटना वाठोडा पोलीस ठाण्याच्या हद्दीतील बीडगाव येथे घडली. मृत बालकाचे नाव अद्वविक शाम भदाडे असे असून, त्याचे वडील शाम भदाडे हे केटरिंग व्यवसाय करतात. काही दिवसांपूर्वी त्यांच्या घरात पेंटिंगचे करण्यात आले होते. त्या वेळी वापरण्यासाठी तारपीन आणण्यात आले होते. काम पूर्ण झाल्यानंतर उरलेली तारपीनची बाटली घरातील स्टोअर रूममध्ये ठेवण्यात आली होती. १२ एप्रिल रोजी सायंकाळी सुमारे ७ वाजताच्या सुमारास अद्वविक घराबाहेर खेळत होता.
खेळता-खेळता तो स्टोअर रूमजवळ पोहोचला. तिथे ठेवलेल्या बाटलीतील द्रव पाणी असल्याचा समज करून त्याने ती तारपीन पिऊन टाकली. तारपीन पिताच त्याची प्रकृती झपाट्याने बिघडू लागली. काही वेळातच तो अस्वस्थ झाला. घडलेला प्रकार लक्षात येताच कुटुंबीयांनी तातडीने त्याला पारडी येथील भवानी रुग्णालयात दाखल केले. मात्र, त्याची प्रकृती गंभीर असल्याने डॉक्टरांनी त्याला शासकीय वैद्यकीय महाविद्यालय व रुग्णालयात (मेडिकल) हलवण्याचा सल्ला दिला. पुढील उपचार सुरू असतानाच या निष्पाप चिमुकल्याने अखेर प्राण सोडले. या घटनेनंतर संपूर्ण परिसरात शोककळा पसरली असून, भदाडे कुटुंबावर दुःखाचा डोंगर कोसळला आहे. एका छोट्याशा दुर्लक्षामुळे एवढी मोठी जीवितहानी झाल्याने नागरिकांमध्येही चिंता व्यक्त होत आहे.
दरम्यान, वाठोडा पोलिसांनी या प्रकरणाची नोंद घेतली असून पुढील तपास सुरू केला आहे. ही घटना पुन्हा एकदा घरामध्ये ठेवण्यात येणाऱ्या धोकादायक रसायनांबाबत गंभीर प्रश्न उपस्थित करते. तारपीन, आम्ल, कीटकनाशके यांसारखे विषारी पदार्थ लहान मुलांच्या आवाक्याबाहेर सुरक्षित ठिकाणी ठेवणे अत्यंत गरजेचे आहे. विशेषतः अशा पदार्थांच्या बाटल्यांवर स्पष्ट लेबल लावणे, त्या लॉक करून ठेवणे किंवा मुलांना सहज पोहोचणार नाही अशा उंच ठिकाणी ठेवणे आवश्यक आहे. पालकांची क्षणिक निष्काळजीपणा देखील जीवघेणा ठरू शकतो, याची जाणीव या घटनेतून पुन्हा एकदा दिसून आली आहे.
लेखकाबद्दलसुनिल लाटेसुनिल प्रभाकर लाटे हे ‘महाराष्ट्र टाइम्स ऑनलाइन’मध्ये कन्सल्टंट या पदावर कार्यरत आहेत. ते गेल्या तीन वर्षांपासून पत्रकारिता क्षेत्रात सक्रिय आहेत. महाराष्ट्र टाइम्स ऑनलाइनमध्ये ते स्थानिक बातम्या, लाइव्ह ब्लॉग कव्हरेज, गुन्हेगारी, राजकारण, देश-विदेश, सरकारी योजना, तसेच इन्फ्रास्ट्रक्चर आणि नागरी विकासाशी संबंधित विषयांवर नियमित लेखन करतात. २०२२ मध्ये पत्रकारितेचे शिक्षण पूर्ण केल्यानंतर त्यांनी आपल्या कारकिर्दीची सुरुवात ‘लोकसत्ता ऑनलाइन’ (मुंबई) येथून केली.सुनिल यांनी राजकारण, मनोरंजन, क्रीडा आणि गुन्हेगारी अशा विविध विषयांचे वार्तांकन व विश्लेषण प्रभावीपणे केले आहे. हायपरलोकल न्यूज, क्राईम रिपोर्टिंग, राजकारण आणि चालू घडामोडींवरील नाविन्यपूर्ण डिजिटल कंटेंट लिहिण्याचा त्यांना दांडगा अनुभव आहे. त्यांनी डॉ. बाबासाहेब आंबेडकर मराठवाडा विद्यापीठाच्या वृत्तपत्रविद्या विभागातून पत्रकारितेतील पदव्युत्तर शिक्षण (MA) पूर्ण केले आहे. शिक्षण घेत असतानाच त्यांनी ‘दैनिक दिव्य मराठी’ आणि ‘दैनिक पुण्य नगरी’ यांसारख्या नामांकित वृत्तपत्रांसाठी बातम्या लिहून प्रत्यक्ष कामाचा अनुभव घेतला. यादरम्यान त्यांनी प्रामुख्याने शिक्षण क्षेत्रातील बातम्यांचे कव्हरेज केले.अचूक आणि प्रभावी डिजिटल रिपोर्टिंग ही सुनिल यांची खासियत आहे. गेल्या तीन वर्षांत त्यांनी उत्कृष्ट ‘न्यूज सेन्स’ आणि ‘ब्रेकिंग न्यूज’ कव्हरेजचे संपादन कौशल्य विकसित केले आहे. महाराष्ट्र टाइम्स ऑनलाइनमध्ये काम करताना वेगवान अपडेट्स देणे आणि डिजिटल वाचकांना समजेल अशा सोप्या शैलीत घडामोडींची मांडणी करणे, यात त्यांनी प्राविण्य मिळवले आहे. पत्रकारितेतील नवनवीन तंत्रे शिकून स्वतःला अधिक सक्षम बनवण्यावर त्यांचा सतत भर असतो.पत्रकारितेसोबतच त्यांना फोटोग्राफी, व्हिडिओ एडिटिंग आणि ग्राफिक्स डिझाइनची विशेष आवड असून, जाहिरात क्षेत्रातही त्यांनी काम केले आहे. सर्जनशील लेखनाची ओढ असलेल्या सुनिल यांनी काही लघुपटांचे दिग्दर्शन आणि पटकथा लेखनही केले आहे. तसेच, संगीत आणि गायन क्षेत्रातही त्यांना विशेष रुची आहे.… आणखी वाचा