सोमवारची सकाळ उजाडली तीच या पुलावरील अपघाताने. या पुलावरच एक मार्गिका कामासाठी बंद असल्याने, येणारी आणि जाणारी वाहतूक एकाच मार्गिकेवरून सुरू होती. याच ठिकाणी झालेल्या अपघातात ११ प्रवाशांना जीव गमवावा लागला. वाहनात क्षमतेच्या दुप्पट प्रवासी भरून भरधाव वाहन चालवणाऱ्या प्रशांत चेंदणे या चालकानेही यात प्राण गमावले.

Kalyan-Ahilyanagar Highway Accident : कल्याण-नगर महामार्ग अपघातात एका कुटुंबातील तिघांसह महसूल अधिकारीही दगावला; आजी आश्चर्यकारकरीत्या बचावली, मृतांची नावे समोर

अपघातानंतर पुलावरील अडथळे हटवून पुलाच्या उर्वरित कामाचा वेग वाढविण्यात आला. वाहतूक पोलिसांनी मिक्सर आणि चक्काचूर झालेली व्हॅन रस्त्यावरून बाजूला हटवून, रस्ता मोकळा केला. अपघातग्रस्त जागेची पाहणी पोलिस आणि आरटीओ अधिकाऱ्यांकडून करण्यात आली..

भीषण अपघाताने खळबळ

कोणी सुट्टीसाठी घरी निघालेले तर कोणी कामावर, कोणाच्या हातात औषधे होती, तर कोणी भाजीपाला विकून घरी निघाले होते… मात्र त्यांचा हा प्रवास अखेरचा ठरला. कल्याण-मुरबाड मार्गावर रायते पुलावर झालेला अपघात इतका भीषण होता की, सिमेंट मिक्सरखाली चिरडलेल्या इको गाडीतील सर्व ११ प्रवाशांचा क्षणार्धात मृत्यू झाला. अपघाताची माहिती मिळताच स्थानिकांनी धाव घेत, अपघातग्रस्तांच्या मदतीसाठी प्रयत्न सुरू केले.

मात्र त्यांच्या हाती लागले ते मृतदेहच. चेहऱ्यावर, मानेत, पाठीत घुसलेल्या तारा कशाबशा काढत स्थानिकांनी ‘कोणी तरी वाचेल,’ या आशेने सर्वांना तत्काळ गोवेली रुग्णालयात पोहोचवले. पण सर्वांचेच श्वास शांत झाले होते. वाहतूक पोलिस, शहर पोलिस, आरटीओ, तहसीलदार, तलाठी यांनी धाव घेतली. स्थानिक आमदार किसन कथोरे यांनीही तत्काळ पोहोचत विचारपूस केली. मृतांच्या नातेवाईकांशी संपर्क साधण्यात आले. त्यानंतर रुग्णालयाच्या आवारात सर्वत्र किंकाळ्या, आक्रोश आणि हंबरडे हेच ऐकू येत होते. यातच मृतदेहांची ओळख पटवण्याची धडपड सुरू झाली.

Kalyan-Ahilyanagar Highway Accident : ईको कारला सिमेंट मिक्सर ट्रकची धडक, एका क्षणात 11 जणांचा करुण अंत, कल्याण अहिल्यानगर महामार्गावर दुर्दैवी घटना

कल्याणकडून मुरबाडकडे निघालेल्या इको व्हॅनमध्ये चालकाने नेहमीप्रमाणे ११ प्रवासी कोंबून सकाळी १०.३० वाजण्याच्या सुमारास प्रवास सुरू केला. रस्ता मोकळा असल्याने त्याने वाऱ्याच्या वेगाने व्हॅन पळवली होती. रायते पुलाचे काम सुरू असल्याने, अनेक ठिकाणी खोदलेला रस्ता, अनेक ठिकाणी एक मार्गिका बंद करत वळवलेला रस्ता यांमुळे हा रस्ता अपघाताला कारणीभूत ठरू शकतो याची कल्पना दररोज या मार्गावर इको व्हॅन चालविणाऱ्या चालकाला होती. मात्र तरीही प्रवाशांच्या जिवाशी खेळ करत, त्याने वेग कमालीचा वाढवला होता. रायते पुलावर समोरून येणाऱ्या सिमेंट मिक्सरला जागा देताना, अचानक त्याचे नियंत्रण सुटले आणि व्हॅन मिक्सरवर धडकली. या अपघातात व्हॅनचा चक्काचूर झाला. काय घडतेय, हे समजण्याआधीच प्रवाशांनी प्राण गमावले.