नेमकी घटना काय?

सकाळी ईदनिमित्त शहरातील मुख्य ईदगाह मैदानावर अनेक मुस्लीम बांधव नमाजसाठी जमले होते. या ठिकाणापासून काही अंतरावरच असलेल्या वाजेगाव बंधारा परिसरात ९:३० च्या सुमारास एक दुचाकीस्वार अचानक आगीच्या भडक्यात अडकला. प्रत्यक्षदर्शींनी दिलेल्या माहितीनुसार, ती व्यक्ती आणि दुचाकी जळत असताना अंगातून आणि गाडीतून मोठ्या स्फोटांचे आवाज येत होते. हे स्फोट नेमके कशाचे होते, याबाबत अद्याप संभ्रम आहे. घटनेची माहिती मिळताच पोलिसांनी धाव घेतली, मात्र उपचारापूर्वीच त्या व्यक्तीचा मृत्यू झाला होता.

एटीएस आणि फॉरेन्सिक कडून कसून तपास

या घटनेत घातपाताचा संशय व्यक्त केला जात आहे. घटनास्थळी पोलिसांना काही संशयास्पद साहित्य मिळाले असून ते तातडीने फॉरेन्सिक तपासासाठी पाठवण्यात आले आहे. राज्य दहशतवाद विरोधी पथक (ATS) देखील या प्रकरणाचा समांतर तपास करत आहे. तो व्यक्ती कोणत्या संघटनेचा होता का? त्याचा हेतू काय होता? आणि स्फोटके असतील तर ती कोठून आली? या सर्व अँगलने तपास सुरू असल्याचे अप्पर पोलीस अधीक्षक सूरज गुरव यांनी सांगितले.

Ashok Kharat : भोंदूबाबा खरातविरुद्ध आणखी तीन महिला पुढे आल्या, लॅपटॉप, CCTV ते CDR; SIT कडून सखोल चौकशी सुरू

मृताची ओळख पटली

पोलिसांनी दिलेल्या माहितीनुसार, मृत व्यक्तीची ओळख पटली आहे. मात्र, तपासाच्या गोपनीयतेसाठी सध्या नाव जाहीर करण्यात आलेले नाही. मिळालेल्या प्राथमिक माहितीच्या आधारे पोलिसांची विविध पथके तपासासाठी रवाना झाली आहेत. घटनास्थळावरील पुराव्यांवरून काही ठोस निष्कर्ष हाती लागण्याची शक्यता वर्तवण्यात येत आहे.

अफवांवर विश्वास ठेवू नका, पोलीस प्रशासनाचे आवाहन

या घटनेनंतर शहरात विविध चर्चांना उधाण आले आहे. “काही लोक जाणीवपूर्वक सोशल मीडियावरून अफवा पसरवत आहेत. नागरिकांनी कोणत्याही चुकीच्या माहितीवर विश्वास ठेवू नये. तपासातून जो काही निष्कर्ष निघेल, तो अधिकृतपणे समोर आणला जाईल,” असे आवाहन सूरज गुरव यांनी केले आहे. सध्या संपूर्ण नांदेड जिल्ह्याचे लक्ष या तपासाकडे लागले असून, या भीषण मृत्यूमागचे गूढ कधी उकलणार, हे पाहणे महत्त्वाचे ठरणार आहे.