भाजप प्रदेशाध्यक्ष व आमदार रविंद्र चव्हाण यांच्या डोंबिवलीकर एक सांस्कृतिक परिवार आणि कल्याण तालुका शारीरिक शिक्षण समिती यांच्या संयुक्त विद्यमाने आयोजित सामूहिक लेझीम वादन स्पर्धेत रविवारी येथील श्री संत सावळाराम क्रीडा संकुल मैदानावर ठाणे जिल्ह्यातील शेकडो शाळांतील विद्यार्थिनी व महिला भगिनींनी एकत्र येत ९,१११ एवढ्या मोठ्या संख्येने सामूहिक लेझीम वादनाचा वर्ल्ड रेकॉर्ड केला.

सांगलीचा विक्रम मोडला

या आधी हा विक्रम सांगलीकरांच्या नावावर होता, अशी माहिती गिनीज वर्ल्ड रेकॉर्डचे लंडनहून आलेले अधिकारी स्वप्नील डांगरेकर यांनी दिली. यापूर्वी ७ हजार ३३८ महिलांनी एकत्र येत तो विक्रम रचला होता. मात्र रविवारी डोंबिवलीत तो विक्रम मोडण्यात आल्याची घोषणा त्यांनी केली.

Ahilyanagar Crime : जामखेड कावेरी हॉटेल गोळीबार प्रकरण; 29 वर्षीय रोहित पवारवर जीवघेणा हल्ला, मुख्य सूत्रधाराला अटक

साडेपाच मिनिटांचे प्रात्यक्षिक

सुमारे साडेपाच मिनिटांचे विविध प्रात्यक्षिक सादर करून महिलांनी हा विक्रम प्रस्थापित केला. त्यावेळी डांगरेकर यांनी आमदार रविंद्र चव्हाण यांच्या पत्नी सुहासिनी रविंद्र चव्हाण यांच्याकडे वर्ल्ड रेकॉर्डचे सर्टिफिकेट आणि मेडल हस्तांतरित केले.

यावेळी रविंद्र चव्हाण यांनी उपस्थितांचे आभार मानत लेझीम ही आपली संस्कृती असून ती टिकवणे हे आपले कर्तव्य असल्याचे सांगितले. पंतप्रधान नरेंद्र मोदी यांनी यंदा शारीरिक व्यायामावर भर देत सशक्त भारताचा संकल्प मांडला असून, त्या निमित्ताने महिला व विद्यार्थिनींनी एकत्र येत हा अनोखा विक्रम केल्याचा आनंद असल्याचे त्यांनी सांगितले.

“हा विक्रम मी भारत मातेच्या चरणी समर्पित करतो,” असेही त्यांनी यावेळी नमूद केले. तसेच कल्याण तालुका शारीरिक शिक्षण समितीचे आभार मानत शिक्षक व विद्यार्थ्यांना महिला दिनाच्या शुभेच्छा दिल्या.

Mumbai Metro: ‘लास्ट माईल’ सेवेवर प्रवाशांनी पाठ फिरवली! मेट्रो 3च्या अनेक स्थानकांवरील बस सेवा बंद; प्रतिसाद का नाही?

जल्लोषात साजरा विक्रम

‘भारत माता की जय’, ‘जय श्रीराम’, ‘वंदे मातरम्’च्या घोषणांनी परिसर दणाणून गेला होता. प्रत्येकाच्या चेहऱ्यावर वर्ल्ड रेकॉर्ड केल्याचा आनंद ओसंडून वाहत होता.

लेझीमचा झंकार सर्वत्र निनादत होता. ढोल-ताशांच्या गजरात हजारो डोंबिवलीकरांनी या विक्रमाचे स्वागत केले आणि सहभागींचे कौतुक केले. या दैदिप्यमान सोहळ्याचे साक्षीदार होण्यासाठी पहाटेपासूनच डोंबिवलीकर मैदानावर जमले होते. अखेर वर्ल्ड रेकॉर्डची घोषणा होताच प्रचंड जल्लोषात आनंद व्यक्त करण्यात आला.

लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा