पोलिसांकडून मिळालेल्या माहितीनुसार, सुरेंद्र उर्फ मोनू मनोज समुद्रे (वय २७), रा. ठक्कर ग्राम, हा २० फेब्रुवारी रोजी संबंधित महिलेच्या घरी गेला. त्याने महिलेकडे अश्लील मागणी करत जबरदस्तीने शारीरिक संबंधांची मागणी केली. मात्र महिलेने ठाम भूमिका घेत त्यास घराबाहेर जाण्यास सांगितले. महिलेकडून विरोध झाल्याने आरोपी संतापला.

यानंतर आरोपीने आपला सूर बदलत थेट ५० हजार रुपयांची मागणी केली. पैसे न दिल्यास गंभीर परिणाम भोगावे लागतील, अशी धमकी त्याने दिली. महिला न घाबरता ठाम राहिल्याने आरोपीने चाकू काढून तिच्या मुलाला ठार मारण्याची धमकी दिली. त्यानंतर महिलेने आरडा ओरडा केला. महिलेच्या आरडाओरडीनंतर आरोपी घटनास्थळावरून पसार झाला. घटनेनंतर पीडित महिलेने तात्काळ शांतिनगर पोलीस ठाण्यात धाव घेत तक्रार नोंदवली. पोलिसांनी तक्रारीची गंभीर दखल घेत तत्काळ शोधमोहीम राबवली आणि काही तासांतच आरोपीला अटक केली.

विशेष म्हणजे, आरोपी दोन महिन्यांपूर्वीच आठ वर्षांची शिक्षा भोगून नागपुरातील तुरुंगातून बाहेर आला असल्याची माहिती पोलिस तपासात समोर आली आहे. त्याच्या गुन्हेगारी पार्श्वभूमीमुळे परिसरात भीतीचे वातावरण निर्माण झाले होते. या घटनेमुळे महिलांच्या सुरक्षेचा प्रश्न पुन्हा एकदा चर्चेत आला आहे. दिवसाढवळ्या घरात घुसून अशा प्रकारे धमकावण्याचे धाडस होत असल्याने कायदा-सुव्यवस्थेबाबत चिंता व्यक्त केली जात आहे. पोलिसांनी मात्र नागरिकांना घाबरून न जाता तात्काळ तक्रार करण्याचे आवाहन केले आहे.

दरम्यान, आरोपीकडून आणखी काही गुन्हे उघडकीस येण्याची शक्यता पोलिसांनी वर्तवली आहे. त्याची सखोल चौकशी सुरू असून, न्यायालयात हजर करून पुढील कारवाई करण्यात येणार आहे. महिलांनी धैर्याने पुढे येत आवाज उठवल्यास अशा प्रवृत्तीला आळा बसू शकतो, असा विश्वास पोलिस अधिकाऱ्यांनी व्यक्त केला आहे.