या प्रकरणामुळे महिलांच्या सुरक्षिततेचा मुद्दा पुन्हा ऐरणीवर आला असून विविध स्तरातून कठोर कारवाईची मागणी होत आहे. व्हायरल झालेल्या व्हिडिओमुळे नागरिकांत संताप वाढला असून, सभ्य चेहऱ्यामागे विकृतीचा खरा चेहरा अशी चर्चा सुरू आहे. राजकारणात उच्च पदावर असलेली व्यक्ती अशा गंभीर आरोपांमध्ये अडकणे म्हणजे समाजातील महिलांच्या विश्वासाला तडा देणारे असल्याचे मत व्यक्त केले जात आहे.

चित्रा वाघ यांचा घणाघात

या प्रकरणावर भाजप नेत्या चित्रा वाघ यांनी सोशल मीडियावरून तीव्र प्रतिक्रिया व्यक्त केली आहे. त्यांनी ट्विट करत भूमिका मांडली आहे. महिलांच्या सुरक्षेवर राजकारण नाहीच पण राजकीय संरक्षण खपवून घेणार नाही. अहिल्यानगरमधील शरद पवार गटाचे शहर जिल्हाध्यक्ष तथा माजी महापौर असलेल्या अभिषेक कळमकरने जे काळं कृत्य केलं त्याला माफी नाही. त्याला कायद्यानुसार शिक्षा होईलच. पण आज माझा थेट प्रश्न १२ मतीच्या मोठ्ठ्या ताईंना आहे. महिलांच्या सन्मानावर मोठमोठी भाषणं करणाऱ्या आज गप्प का? त्या नराधमाला तुमच्या पक्षातून तात्काळ बडतर्फ करणार नाही का? लक्षात ठेवा मौन हे देखील सहकार्यासारखंच असतं. हा फक्त एका मुलीचा प्रश्न नाही. हा महाराष्ट्रातील प्रत्येक स्त्रीच्या सुरक्षिततेचा प्रश्न आहे, असं चित्रा वाघ म्हणाल्या आहेत. त्यांनी अप्रत्यक्षपणे ज्येष्ठ नेते शरद पवार यांच्या पक्ष नेतृत्वावरही प्रश्न उपस्थित केले असून आरोपीवर तात्काळ कारवाईची मागणी केली आहे.

तपासावर सर्वांचे लक्ष

या प्रकरणात सध्या एकच व्हिडिओ समोर आला असला तरी आरोपीच्या मोबाईलमधून आणखी धक्कादायक बाबी समोर येऊ शकतात, अशी शक्यता व्यक्त होत आहे. पोलीस तपासातून या प्रकरणाचे संपूर्ण सत्य उघड होईल, अशी अपेक्षा व्यक्त केली जात आहे. या प्रकरणामुळे महिलांच्या सुरक्षेचा मुद्दा पुन्हा चर्चेत आला असून दोषींवर कठोर कारवाई व्हावी, अशी मागणी नागरिकांकडून होत आहे. अहिल्यानगर प्रकरणात पुढे काय उलगडणार? याकडे राज्याचे लक्ष लागले आहे.