अनिकेत दिलीप निंबाळकर वय वर्ष २३ राहणार लांजुळ तालुका खामगाव जिल्हा बुलढाणा असे या मृत विद्यार्थ्यांचे तर मनोज सदाशिव भिलन असे जखमी विद्यार्थ्याचे नाव आहे. आठ फेब्रुवारी रोजी सकाळी अनिकेतसह मनोज सदाशिव भिलन , अविनाश नीतावने, विशाल भंडारे व इतर तरुण आईसाहेब लॉन्स येथे लग्नात केटरिंगच्या कामासाठी गेले होते. काम आटोपल्यानंतर रात्री उशिरा वाहनाची कोणतीही सोय नसल्याने सर्वजण पाई पहाडसिंगपुराकडे निघाले.

हर्सुल जुना जकात नाक्याच्या पुढे येणाऱ्या सुसाट कार क्रमांक MH 20 FU 75 75 चा चालक मंगेश कोलते यांनी अनिकेत निंबाळकर व मनोज भिलन यांना जोराची धडक दिली. धडकेमध्ये दोघेही गंभीर जखमी झाले. त्यांना तातडीने घाटी रुग्णालयात दाखल करण्यात आले. मात्र उपचार सुरू असतानाच पहाटे पावणे चार वाजेच्या सुमारास अनिकेतचा मृत्यू झाला. मनोज भिलन याच्यावर खाजगी रुग्णालयात उपचार सुरू असून त्याची प्रकृती गंभीर असल्याची माहिती पोलीस निरीक्षक स्वाती केदार यांनी दिली आहे.

अनिकेत सोबतच कुटुंबीयांचे स्वप्नभंगले

अनिकेत निंबाळकर याची आर्थिक परिस्थिती नाजूक होती. तो अभ्यासात हुशार असल्याने कुटुंबीयांनी त्याला शिक्षणासाठी संभाजीनगरात पाठविले होते. तो समाजकार्य एम एस डब्ल्यू विषयात पीएचडीचे शिक्षण घेत होता. तसेच स्पर्धा परीक्षेची तयारी करत होता. आई आणि भाऊ कंपनीत जाऊन तर वडील शेती करून त्याला शिक्षणासाठी मदत करीत होते. तसेच अनिकेतही मिळेल ते काम करून खर्चाला हातभार लावायचा. शिकून मोठा अधिकारी व्हावे अशी सर्वांची इच्छा होती. मात्र या अपघाताने अनिकेतसह निंबाळकर कुटुंबियांचे स्वप्न भंगले.