रामेश्वरचा शोध लागत नसल्याने चिंताग्रस्त झालेल्या त्याच्या आईने अखेर सोमवारी तलवाडा पोलीस ठाण्यात धाव घेतली. त्यांच्या तक्रारीवरून पोलिसांनी तरुण बेपत्ता असल्याची अधिकृत नोंद केली होती. पोलीस आणि नातेवाईक त्याचा शोध घेत असतानाच, आज (मंगळवारी) सकाळी अंबिका नगर भागातील एका विहिरीत एक मृतदेह तरंगताना नागरिकांना दिसून आला. ही माहिती वाऱ्यासारखी पसरताच घटनास्थळी मोठी गर्दी जमली.

घटनास्थळी पोलीस दाखल

विहिरीत मृतदेह असल्याची माहिती मिळताच तलवाडा पोलीस ठाण्याचे सहाय्यक पोलीस निरीक्षक मनोज निलगेकर यांच्या मार्गदर्शनाखाली उपनिरीक्षक कैलास अन्नादास, बीट अंमलदार अंजन गडदे आणि पोलीस हवालदार नारायण काकडे यांनी तातडीने घटनास्थळी धाव घेतली. ग्रामस्थांच्या मदतीने मृतदेह विहिरीबाहेर काढण्यात आला, तेव्हा तो रामेश्वर शिंगणे याचाच असल्याचे निष्पन्न झाले.

Nanded Crime: राजकारणाची नशा, सरपंचाचा सल्ला अन् थेट पोटच्या मुलीला संपवलं; नांदेडमधील थरारक प्रकरणात विद्यमान सरपंचालाही अटक

तीन दिवस मृतदेह पाण्यात

तीन दिवस मृतदेह पाण्यात राहिल्यामुळे तो पूर्णपणे छिन्न-विच्छिन्न अवस्थेत झाला होता. मृतदेहाची अवस्था पाहता, त्याचे विच्छेदन रुग्णालयात नेऊन करणे शक्य नव्हते. त्यामुळे वैद्यकीय नियमांनुसार आणि परिस्थितीचे गांभीर्य ओळखून कायदेशीर प्रक्रिया पूर्ण केल्यानंतर घटनास्थळीच त्याचे शवविच्छेदन करण्यात आले.

कुटुंबावर कोसळला दुःखाचा डोंगर

रामेश्वर हा केवळ २५ वर्षांचा तरुण होता. रागाच्या भरात घेतलेला एक निर्णय त्याच्या जीवावर बेतला की अन्य काही कारण होते, याचा तपास आता पोलीस करत आहेत. आईने दिलेल्या तक्रारीनंतर पोलीस या प्रकरणाचा सर्व बाजूंनी तपास करत असून, त्याच्या मृत्यूचे नेमके कारण शवविच्छेदन अहवालानंतर स्पष्ट होईल. ऐन उमेदीच्या काळात तरुण मुलाचा असा अंत झाल्याने शिंगणे कुटुंबावर दुःखाचा डोंगर कोसळला आहे. याचा पुढील तपास तलवाडा पोलीस करत आहेत.