पनवेल
पनवेल तालुक्यातील कराडे खुर्द गावात एक हृदयद्रावक घटना घडली आहे. नेहमीप्रमाणे देवदर्शनासाठी घराबाहेर पडलेल्या वृद्ध महिलेचा पाताळगंगा नदीत मृत्यू झाल्याने संपूर्ण परिसरात शोककळा पसरली आहे. बायोब लक्ष्मण पवार (वय 61), रा. कराडे खुर्द, या शनिवारी, 30 जानेवारी रोजी गावालगतच्या नदीकाठी असलेल्या मारुतीच्या देवळात दिवाबत्ती करण्यासाठी घरातून निघाल्या होत्या. मात्र बराच वेळ उलटूनही त्या घरी परतल्या नाहीत. त्यानंतर भयंकर घटना समोर आली.
दरम्यान, कराडे गावाच्या हद्दीत पाताळगंगा नदीच्या पात्रालगत महिलेची पादत्राणे आढळून आल्याने संशय अधिक गडद झाला. त्यानंतर पोलिस आणि ग्रामस्थांनी नदी परिसरात बारकाईने पाहणी केली असता पाण्यात एक मृतदेह आढळून आला. ही घटना तुंगारतन शाळेच्या मागील बाजूस, नवीन पुलाचे काम सुरू असलेल्या ठिकाणी, रसायनी पोलीस ठाण्याच्या हद्दीत घडली.
पोलीस निरीक्षक माळी, स्थानिक ग्रामस्थ तसेच हेल्थ फाउंडेशनच्या पथकाच्या संयुक्त प्रयत्नांतून मृतदेह पाण्याबाहेर काढण्यात आला. वैद्यकीय तपासणीनंतर डॉक्टरांनी बायोब लक्ष्मण पवार यांना मृत घोषित केलं. प्राथमिक तपासात नदीत बुडून मृत्यू झाल्याची शक्यता वर्तवण्यात येत असून, मृत्यूचं नेमकं कारण शवविच्छेदन अहवालानंतर स्पष्ट होणार आहे.
धार्मिक वृत्तीच्या, शांत स्वभावाच्या आणि सर्वांशी मिळूनमिसळून वागणाऱ्या महिलेचा असा अचानक आणि दुर्दैवी अंत झाल्याने कराडे खुर्दसह गुळसुंदे आणि आसपासच्या परिसरात हळहळ व्यक्त केली जात आहे. घटनेची माहिती मिळताच अनेक ग्रामस्थांनी घटनास्थळी गर्दी केली होती. दरम्यान, रसायनी पोलीस या घटनेचा सखोल तपास करत असून, सर्व बाबींची चौकशी सुरू आहे.