पिंकीचे शेवटचे शब्द

‘पप्पा, मी उपमुख्यमंत्री अजित पवार यांच्यासोबत बारामतीला जाणार आहे. त्यानंतर नांदेडला जाईन आणि तेथील हॉटेलमध्ये पोहोचताच तुम्हाला फोन करीन.’ हे पिंकीचे वडील शिवकुमार यांच्यासोबतचे अखेरचे संभाषण. शिवकुमार हे हुंदका देत मुलीचे हे शेवटचे शब्द सांगत असताना त्यांच्या घरासह ते राहत असलेल्या वरळी परिसरावरील शोककळा गडद झाली.उपमुख्यमंत्री अजित पवार यांच्यासोबत विमान अपघातात मृत्युमुखी पडलेली पिंकी माळी तब्बल पाच वर्षे या क्षेत्रात कार्यरत होती. स्वत: आकाशात झेपावलेल्या पिंकीने आणखी एक स्वप्न पाहिले होते. तिला आपल्या लहान भावाला वैमानिक करायचे होते. त्यासाठी ती मेहनत घेत होती. मात्र, हे स्वप्न पूर्ण होण्याआधीच काळाने तिच्यावर झडप घातली.
Ajit Pawar : अजित पवारांच्या विमान अपघाताचं नेमकं कारण काय? ब्लॅक बॉक्सकडे महाराष्ट्राचं लक्ष, कॉकपिटमधलं शेवटचं संभाषण आता…
पिंकीचे वडील शिवकुमार माळी काही वर्षांपूर्वी दिल्ली विमानतळावर काम करत होते. त्या काळातील काही घडामोडींमुळे त्यांची नोकरी सुटली. मात्र, त्यांच्या विमानसेवेचा अनुभव पिंकीच्या बालमनावर खोलवर कोरला गेला होता. वडिलांकडून विमानतळावरील गोष्टी ऐकतच ती मोठी झाली आणि तेव्हाच आपण विमान क्षेत्रात काम करायचे, हे स्वप्न तिने उराशी बाळगले. सातत्य, प्रयत्न, प्रशिक्षण आणि चिकाटीच्या जोरावर पिंकीने खासगी विमानांमध्ये फ्लाइट अटेंडण्ट म्हणून स्थान मिळवले.

आपल्या कार्यकाळात पिंकीने राष्ट्रपती, मुख्यमंत्री, उपमुख्यमंत्र्यांच्यासह अनेक नेत्यांसोबत प्रवास केला. गेले तीन दिवस ती अजित पवार यांच्यासोबत दौऱ्यावर होती. हा दौरा संपल्यानंतर ती नांदेड येथे जाणार होती. मात्र, तो प्रवास अपूर्णच राहिला.

२७ जानेवारीच्या रात्री पिंकीने वडिलांना शेवटचा फोन केला. उद्या सकाळी लवकर अजितदादांसोबत बारामतीला जाणार असून, त्यानंतर नांदेडला जाणार असल्याचे तिने सांगितले. हेच तिचे वडिलांसोबतचे शेवटचे बोलणे ठरले. अजित पवार यांच्यासोबत प्रवास करण्याची ही पिंकीची चौथी वेळ होती, अशी माहिती तिच्या वडिलांनी माध्यमांना दिली
Ajit Pawar : दादांच्या मृत्यूबाबत शरद पवारांपासून आधी लपवलेलं; तुम्ही असे का उभे आहात? ‘त्या’ गोष्टीमुळे शंका येताच काकांनी विचारलं अन्…
‘पिंकी लहानपणापासूनच मेहनती होती. ती अतिशय मनमोकळा स्वभाव, हुशार आणि कुणाशीही वाद न घालणारी तरुणी होती’, असे तिचे नातेवाईक आणि शेजारी सांगतात.