काँग्रेसनं तरुण आणि कार्यक्षम चेहरा दिला, अशा व्यक्तीच्या हातात नेतृत्व दिलं, तर पक्षाला २०२९ मध्ये पुनरागमनाची संधी असल्याची चर्चा पक्षात जोर धरु लागली आहे. आमदार आणि माजी मंत्री अमित देशमुख यांच्यासारख्या चेहऱ्याला काँग्रेसनं संधी द्यावी, अशी चर्चा सुरु झाली आहे. द न्यू इंडियन एक्स्प्रेसनं याबद्दलचं वृत्त दिलं आहे. आमदार अमित देशमुख यांनी लातूर महापालिका निवडणुकीत काँग्रेसचं नेतृत्व केलं. तिथे पक्षाला बहुमत मिळालं आहे. महापालिकेत अन्य कोणत्याही पक्षाच्या पाठिंब्याशिवाय काँग्रेसचा महापौर होणार आहे. याच यशाचा दाखला देशमुख यांचं नाव पुढे करताना दिला जात आहे.

अमित देशमुख यांच्याकडे मोठा राजकीय वारसा आहे. त्यांचे वडील दिवंगत विलासराव देशमुख मुख्यमंत्री होते. अमित देशमुख लातूर शहर विधानसभा मतदारसंघातून सलग चारवेळा आमदार झाले आहेत. २००९ पासून ते सातत्यानं निवडून येत आहेत. विशेष म्हणजे काँग्रेसच्या नेतृत्वालादेखील अमित देशमुख यांच्यावर विश्वास आहे. देशमुख राज्यातील काँग्रेसमध्ये सकारात्मक बदल घडवतील, असा विश्वास नेतृत्त्वाला आहे. पण त्यांच्याकडे राज्याची जबाबदारी कधी दिली जाणार, याबद्दल अद्याप तरी निर्णय झालेला नाही.

१६ जानेवारीला राज्यातील २९ महापालिकांच्या निवडणुका झाल्या. १७ जानेवारीला निकाल जाहीर झाले. भाजपनं १९ महापालिकांमध्ये एकहाती सत्ता मिळवली. तर अन्य ६ महापालिकांमध्ये मित्रपक्षांच्या मदतीनं बहुमताचा आकडा गाठला. काँग्रेसला अगदी मोजक्या महापालिकांमध्ये समाधानकारक कामगिरी करता आली. त्यात लातूर महापालिकेचा समावेश आहे.

आमदार अमित देशमुख यांच्या नेतृत्त्वात काँग्रेसनं लातूर महापालिका निवडणूक लढवली. महापालिकेत एकूण ७० सदस्य संख्या आहे. पैकी ४३ जागा काँग्रेसनं जिंकल्या. काँग्रेसनं कोणत्याही पक्षाच्या मदतीशिवाय बहुमताचा आकडा गाठला आहे. इथे भाजपला २२ जागा मिळाल्या. शिंदेसेना, ठाकरेसेना आणि शरद पवारांच्या राष्ट्रवादीला लातूरमध्ये भोपळाही फोडता आला नाही.