नेमकी घटना काय?

नाशिकमध्ये ७७ व्या प्रजासत्ताक दिन ानिमित्त आयोजित मुख्य शासकीय ध्वजारोहण सोहळ्यात पालकमंत्री गिरीश महाजन यांनी उपस्थितांना संबोधित केले. प्रजासत्ताक दिन हा संविधानाच्या अंमलबजावणीचा दिवस असतानाही, महाजन यांनी आपल्या संपूर्ण भाषणात एकदाही डॉ. बाबासाहेब आंबेडकरांच्या नावाचा उल्लेख केला नाही. पालकमंत्र्यांनी हे नाव जाणीवपूर्वक टाळले की ते विसरले, याबाबत संभ्रम असला तरी या घटनेचे तीव्र पडसाद उमटले आहेत.

महिला वनरक्षकाचा संताप

कार्यक्रमात उपस्थित असलेल्या माधवी जाधव नावाच्या महिला वनरक्षकाने या प्रकाराबद्दल भर सभेत संताप व्यक्त केला. “संविधानामुळेच आज सर्व पदे आणि अधिकार आहेत, मग संविधानाच्या जनकाचे नाव घेण्यास विसर का पडला?” असा सवाल त्यांनी उपस्थित केला. “मला निलंबित केले तरी चालेल, पण बाबासाहेबांची ओळख पुसू देणार नाही,” अशा शब्दांत त्यांनी पालकमंत्र्यांना जाब विचारला.

खळबळजनक: मतदान केंद्र शोधता शोधता सापडला बनावट दारूचा अड्डा; सोलापूरात दीड कोटींचा मुद्देमाल जप्त! पोलिसांची सर्वात मोठी कारवाई

प्रकाश आंबेडकरांचा इशारा

या घटनेनंतर प्रकाश आंबेडकर यांनी माधवी जाधव यांच्याशी फोनवरून संवाद साधला आणि त्यांचे समर्थन केले. आंबेडकर म्हणाले की, “मंत्री गिरीश महाजन यांचे कृत्य ही नीच मानसिकता दर्शवणारे असून तो अॅट्रोसिटी कायद्यांतर्गत गुन्हा आहे. वंचित बहुजन आघाडीची स्थानिक समिती पोलिसांत तक्रार करत आहे. जर पोलिसांनी गुन्हा दाखल केला नाही, तर मी स्वतः कायदेशीर मसुदा तयार करून त्यांना कारवाई करण्यास भाग पाडेन.”

दरम्यान, या प्रकरणामुळे नाशिकमध्ये राजकीय वातावरण चांगलेच तापले आहे. संविधानाचा आणि लोकशाहीचा उत्सव साजरा करताना त्यातील मुख्य नायकाचे नाव न घेणे ही मोठी चूक असल्याचे मत व्यक्त केले जात आहे.