नेमकं प्रकरण काय आहे?

डोंबिवली स्टेशनबाहेर एकता सावंत ही मराठी तरुणी आपला फूड स्टॉल चालवून उदरनिर्वाह करते. मात्र, महापालिकेने तिच्या स्टॉलवर कारवाई करत तो हटवला. यावेळी स्टेशन परिसरात मोठी गर्दी झाली होती आणि परिस्थिती नियंत्रणात आणण्यासाठी पोलिसांना सौम्य लाठीचार्ज करावा लागला. यामुळे वातावरण अधिकच तापले.

एकता सावंत यांनी केले खळबळजनक आरोप

माध्यमांशी संवाद साधताना आणि अविनाश जाधव यांच्यासमोर आपली व्यथा मांडताना एकताने प्रशासनातील भ्रष्टाचाराचा पाढाच वाचला. या परिसरात परप्रांतीय फेरीवाल्यांचे वर्चस्व असून, स्टॉल चालवण्यासाठी दररोज ३०० रुपये हप्ता घेतला जातो, असा खळबळजनक दावा तिने केला. “हा हप्ता पोलीस, केडीएमसी आणि जागेचे मालक या सर्वांकडे जातो,” असाही आरोप तिने केला आहे.

मराठी तरुणीवर अन्याय

“सण-उत्सवाच्या काळात माझा धंदा बंद पाडला जातो, मात्र परप्रांतीय फेरीवाल्यांवर कोणतीही कारवाई होत नाही. उलट, ते लोक माझ्यावर हसतात”, असे तिने रडत रडत सांगितले.

राज ठाकरेंच्या फोटोची मागणी

“मला इथेच हक्काची टपरी मिळवून द्या आणि त्यावर मला राज साहेबांचा फोटो लावायचा आहे,” अशी मागणी तरुणीने केली आहे.

आतापर्यंत या प्रकरणात काय घडलं?

तरुणीची ही व्यथा सोशल मीडियावर व्हायरल होताच राज ठाकरे यांनी या प्रकरणाची दखल घेतली. त्यांनंत मनसे नेते अविनाश जाधवांनी या तरुणीची भेट घेतली आणि तिला धीर दिला. “राज साहेब स्वतः महापालिका आयुक्तांशी बोलतील आणि तुला न्याय मिळवून देतील,” असे आश्वासन जाधवांनी तरुणीला दिले आहे. दरम्यान, यावेळी अविनाश जाधवांनी मनसे स्टाईल इशारा दिला आहे. “तुझी गाडी इथेच लाव, आम्ही बघतो कोण येतंय ते,” असे म्हणत मनसेने पुन्हा एकदा आक्रमक पवित्रा घेतला आहे.